IPL 2025 : इंडियन प्रीमियर लीगच्या नव्या सीझनला लवकरच सुरुवात होणार आहे. चॅम्पियन्स ट्रॉफीनंतर सर्व क्रिकेट चाहत्यांना आयपीएलचे वेध लागले आहेत. अशातच मुंबई इंडियन्सच्या चाहत्यांसाठी काहीसा दिलासा देणारी माहिती समोर आली आहे. मुंबईचा स्टार गोलंदाज जसप्रीत बुमराह लवकरच मैदानात उतरणार असल्याचा अंदाज वर्तवला आहे.

ESPNCricinfo च्या रिपोर्टनुसार, बीसीसीआयच्या वैद्यकीय अधिकाऱ्यांकडून मंजुरी मिळाल्यास बुमराह एप्रिल महिन्याच्या सुरुवातीच्या आठवड्यात मुंबई इंडियन्सच्या कॅम्पमध्ये सामील होण्याची अपेक्षा आहे. बुमराह किती सामने खेळेल आणि तो मैदानावर कधी परतेल याची निश्चित तारीख ठरली नसल्याचेही रिपोर्टमध्ये म्हटले आहे.

बॉर्डर-गावस्कर ट्रॉफी दरम्यान बुमराहच्या पाठीला दुखापत झाली होती. या दुखापतीमुळे जसप्रीत बुमराह चॅम्पियन्स ट्रॉफी २०२५ मध्ये सहभागी झाला नव्हता. तो आयपीएल २०२५ खेळेल की नाही याकडे सर्वांचे लक्ष लागले होते. मुंबई इंडियन्सने १८ कोटी रुपये देऊन बुमराहला रिटेन केले होते.

मुंबई इंडियन्ससाठी जसप्रीत बुमराह महत्त्वपूर्ण खेळाडू आहे. बुमराह व्यतिरिक्त मुंबईच्या संघामध्ये ट्रेंट बोल्ड, दीपक चहर असे वेगवान गोलंदाज देखील आहेत. याशिवाय मुंबई इंडियन्सचा कर्णधार हार्दिक पंड्या देखील वेगवान गोलंदाजी करतो. त्यामुळे बुमराह नसतानाही मुंबईच्या संघाला फारसा त्रास होणार नाही असे म्हटले जात आहे.