भारत आणि वेस्ट इंडीज यांच्यातील पहिल्या कसोटी सामन्यात भारताचं पारडं जड दिसून येत आहे. कसोटीच्या दुसऱ्या दिवशीचा खेळ संपला असून, भारतानं पहिल्या डावात ५ विकेटच्या बदल्यात ४४८ धावांचा डोंगर उभारला आहे. त्यामुळं वेस्ट इंडीजचा संघ बॅकफूटला गेला असून, भारताच्या विजयाची शक्यता जवळपास ९८ टक्क्यांपेक्षा अधिक झाली आहे.

अहमदाबादच्या नरेंद्र मोदी स्टेडियममध्ये भारत-वेस्ट इंडीज कसोटी सामना सुरू आहे. या सामन्याच्या दुसऱ्या दिवसाचा म्हणजे ३ ऑक्टोबरचा खेळ संपला आहे. भारतानं ५ विकेट गमावून ४४८ धावा केल्या आहेत. रविंद्र जडेजा १०४ आणि वॉशिंग्टन सुंदर हा ९ धावांवर खेळत आहे. २८६ धावांची आघाडी भारताकडं आहे. सध्या भारतीय संघ भक्कम स्थितीत आहे. जडेजा, ध्रुव जुरेल आणि केएल राहुल या तिघांनी शतक झळकावले आहेत. वेस्ट इंडिजचा पहिला डाव १६४ धावांवर गुंडाळला आहे.

आतापर्यंत कशी झाली भारतीय फलंदाजी?

यशस्वी जयस्वाल आणि केएल राहुलनं भारताच्या डावाची सुरुवात चांगली केली. पहिल्या विकेटसाठी ६८ धावांची भागीदारी केली. यशस्वी ३६ धावा करून बाद झाला. तर तिसऱ्या क्रमांकावर आलेल्या साई सुदर्शनला फक्त ७ धावा करता आल्या. त्यानंतर राहुल आणि कर्णधार शुभमन गिल यांनी डाव सावरला. राहुलने पहिल्या दिवशी अर्धशतक पूर्ण केलं होतं.

दुसऱ्या दिवशी पहिल्याच सत्रात गिल आणि राहुल यांनी सुरेख फलंदाजी केली. दोघांमध्ये तिसऱ्या विकेटसाठी ९८ धावांची भागीदारी झाली. शुभमन यानं ५ चौकारांच्या मदतीने १०० चेंडूंत ५० धावा केल्या. रोस्टन चेज यानं गिलला बाद केलं. पण राहुलनं दुसरीकडं आपलं शतक पूर्ण केलं. त्यानं १०० धावा केल्या. त्यात १२ चौकारांचा समावेश आहे. राहुलचं हे ११ वं शतक आहे. तर मायदेशातील दुसरं शतक आहे.

राहुल बाद झाल्यानंतर रविंद्र जडेजा आणि ध्रुव जुरेल यांनी पाचव्या विकेटसाठी २०६ धावांची भागीदारी केली. जुरेल यानं कसोटी कारकिर्दीतील पहिलं शतक झळकावलं. त्यानं १५ चौकार आणि तीन षटकारांच्या मदतीनं १२५ धावा केल्या. जडेजानंही शतक साजरं केलं. ६ चौकार आणि ५ षटकारांच्या जोरावर त्यानं १०४ धावा केल्या. त्याचं कसोटी कारकिर्दीतील हे सहावं शतक आहे.