Ind Vs Srilanka ODI Series: भारत आणि श्रीलंका यांच्यातील तिसरा एकदिवसीय सामना नुकताच पार पडला. मालिकेतील अंतिम सामन्यात सलामवीर शुभमन गिलने तडाखेबंद शतकी खेळी केली. त्याच्यासोबत विराट कोहलीनेही श्रीलंकन गोलंदाजांची धुलाई करताना वादळी दीडशतकी खेळी केली. या दोन शतकांमुळेच टीम इंडियाने धावांचा डोंगर उभा करत हा सामना तब्बल ३१७ धावांनी विजय मिळवला.

पण, सध्या भारतीय सलामवीर शुभमन गिलच्या शतकी खेळीपेक्षा एका व्हायरल व्हिडिओचीच जोरदार चर्चा रंगली आहे. या व्हिडिओमध्ये शुभमन गिलला प्रेक्षक सारा सारा म्हणून चिडवताना दिसत आहेत. (Viral Video)

याबाबत अधिक माहिती अशी की, शुभमन गिल श्रीलंकेची फलंदाजी सुरु असताना सीमारेषेजवळ क्षेत्ररक्षण करत होता. त्यावेळी त्याला पाहून स्टेडिअममध्ये बसलेल्या प्रेक्षकांच्या समूहाने अचानक ‘सारा…सारा’ ओरडण्यास सुरुवात केली. तसेच, गिलला चिडवण्याचा प्रयत्न केला.

या घटनेचा व्हिडिओ एका युजरने सोशल मीडियावर शेअर केला. यानंतर हा व्हिडिओ काही क्षणातच व्हायरल झाला. खरं तर, सोशल मीडियावर अशी चर्चा रंगली आहे की, शुबमन गिल आणि सारा अली खान (Sara Ali Khan) हे एकमेकांना डेट करत आहेत. कारण दोघेही काही दिवसांपूर्वी एकत्र स्पॉट झाले होते.

तेव्हापासून शुभमन गिल आणि सारा अली खान यांच्या प्रेमप्रकरणाची चर्चा माध्यमांमध्ये रंगली होती. त्याचबरोबर शुभमन गिल आणि सचिन तेंडूलकरची (Sachin Tendulkar) मुलगी सारा तेंडूलकर यांच्याही नावाची चर्चा होताना दिसत आहे.