आयसीसी वनडे वर्ल्डकप स्पर्धेचा सहावा सामना भारत आणि पाकिस्तानच्या संघात होत आहे. या सामन्यात पाकिस्तानने नाणेफेक जिंकत प्रथम गोलंदाजी करण्याचा निर्णय घेतला. भारताने प्रथम फलंदाजी करताना षटकात सर्व गडी गमवून 50 षटकात 247 धावा केल्या. या आव्हानाचा पाठलाग करताना पाकिस्तानने सावध सुरुवात केली.

पण पाकिस्तानला पहिला धक्का मुनीबा अली सिद्दकीच्या रुपाने बसला. चौथ्या षटकाच्या शेवटच्या चेंडूवर पाकिस्तानला पहिला धक्का मिळाला. मात्र तिच्या मुनीबा अली सिद्दकीच्या आऊट होण्यावरून मात्र मैदानात चांगलाच राडा झाला. पंचांनी तिला बाद ठरवल्यानंतर पाकिस्तान कर्णधार थेट पंचाला भिडली.

त्याच झालं असं, भारतीय संघाची गोलंदाज क्रांती गौड षटक टाकत होती. तिने टाकलेला एक चेंडू मुनीबाच्या पॅडला लागला. यासाठी क्रांतीने जोरदार अपील केली. पण पंचांनी नाबाद दिलं. पण याच दरम्यान मुनीबा अलीने क्रीझ सोडलं होतं. ही संधी हेरत दीप्ती शर्माने स्टंपवर थ्रो केला. यावेळी मुनीबाने बॅट वर उचलली होती आणि तेव्हाच चेंडू स्टंपवर आदळला. तसेच शरीरही क्रीझबाहेर होते. म्हणून पंचांनी तिला बाद दिलं.

विचित्र पद्धतीने धावचीत दिल्याने पाकिस्तानची कर्णधार फातिमा सना संतापली. या विकेटनंतर फातिमा सनाने थेट पंचांना धारेवर धरलं. तिसऱ्या पंचांनी बाद दिल्यानंतर काही काळ पाकिस्तानची कर्णधार फातिमा सना आणि पंचांमध्ये वाद झाला.