India vs England 2nd Test Pitch Report:

भारत आणि इंग्लंड हे दोन्ही संघ दुसऱ्या कसोटी सामन्यासाठी सज्ज झाले आहेत. मालिकेतील दुसरा कसोटी सामना २ फेब्रुवारीपासून विशाखापट्टनमच्या मैदानावर रंगणार आहे. पहिला कसोटी सामना हैदराबादच्या मैदानावर पार पडला. या सामन्यात फिरकी गोलंदाजांचा बोलबाला पाहायला मिळाला होता. आता दुसऱ्या कसोटीतील खेळपट्टी फलंदाजांसाठी फायदेशीर ठरणार की गोलंदाजांना मदत मिळणार? याबाबत अजूनही संभ्रम कायम आहे. (IND vs ENG 2nd Test Pitch Report)

कशी असेल विशाखापट्टनची खेळपट्टी?

विशाखापट्टनमची खेळपट्टी ही फिरकी गोलंदाजांसाठी फायदेशीर ठरणार यात काहीच शंका नाही. मात्र चेंडू पहिल्या दिवसापासूनच फिरणार का?यावर अजूनही प्रश्नचिन्ह आहे. भारतीय संघाचे फलंदाजी प्रशिक्षक विक्रम राठोड यांचं स्पष्ट म्हणणं आहे की, खेळपट्टीबाबत भविष्यवाणी करणं जरा कठीण आहे. या खेळपट्टीवर दुसऱ्या दिवसापासून चेंडू फिरु शकतो. (Cricket news in marathi)

या मैदानावर खेळल्या गेलेल्या गेल्या २ सामन्यांचा रेकॉर्ड पाहिला तर, फलंदाजांनी धावांचा पाऊस पाडला आहे. भारतीय संघाने गेल्या दोन्ही सामन्यांमध्ये बाजी मारली आहे. २०१६ मध्ये याच मैदानावर भारत आणि इंग्लंड हे दोन्ही संघ आमने सामने आले होते. या सामन्यात भारतीय संघाने इंग्लंडवर २४६ धावांनी विजय मिळवला होता.

या सामन्यात विराट कोहलीने दोन्ही डावात मिळून २४८ धावा चोपल्या होत्या. त्यानंतर पुढील सामन्यात भारत आणि दक्षिण आफ्रिका हे दोन्ही संघ आमने सामने आले होते. २०१९ मध्ये झालेल्या या सामन्यात भारतीय संघाने २०३ धावांनी विजय मिळवला होता. भारतीय संघाकडून फलंदाजी करताना रोहित शर्माने पहिल्या डावात १७६ तर दुसऱ्या डावात १२७ धावांची खेळी केली होती.