डब्लिंग : भारताने (India) आयर्लंडविरुद्ध ७ विकेटने विजय मिळवला. डब्लिन येथे खेळल्या गेलेल्या पहिल्या T20 सामन्यात भारताने आयर्लंडचा ७ गडी राखून पराभव करत मालिकेत १-० अशी आघाडी घेतली. भारताने १०९ धावांचे लक्ष्य ९.२ षटकात पूर्ण केले.

भारत आणि आयर्लंड यांच्यातील दोन सामन्यांच्या T20 मालिकेतील हा पहिला सामना होता. हा सामना डब्लिनमध्ये खेळला गेला जिथे भारतीय संघाची कमान हार्दिक पांड्याकडे होती. हार्दिकने नाणेफेक जिंकून प्रथम गोलंदाजी करण्याचा निर्णय घेतला. हा सामना १२-१२ षटकांचा केला. पावसामुळे षटक कमी करण्यात आले. (IND vs IRE)

प्रथम फलंदाजी करताना आयर्लंडच्या संघाने १२ षटकांत १०८ धावा केल्या. हॅरी टॅक्टरने सर्वाधिक नाबाद ६४ धावा केल्या. भारताकडून (India) युझवेंद्र चहलने चांगली कामगिरी केली. त्याने ३ षटकात ११ धावा देऊन १ बळी घेतला. त्यानंतर १०९ धावांच्या लक्ष्याचा पाठलाग करताना भारतीय संघाची धमाकेदार सुरुवात झाली.

सलामीला आलेल्या इशान किशनने अवघ्या ११ चेंडूत २६ धावा केल्या. नंतर दीपक हुडा आणि कर्णधार हार्दिक पांड्याने धावसंख्या ९४ धावांपर्यंत नेली. हार्दिक पांड्याने बाद होण्यापूर्वी १२ चेंडूत २४ धावा केल्या. भारताकडून दीपक हुडाने चांगली खेळी करत सर्वाधिक धावांचे योगदान दिले. हुडाने २९ चेंडूत ४७ धावा केल्या.