भारतीय क्रिकेट संघाने पहिल्या सामन्यातील पराभवाचा बदला घेत झिम्बाब्वेला मात दिलीय. अभिषेक शर्मा, ऋतुराज गायकवाड, रिंकू सिंग यांच्या शानदार फलंदाजीनंतर गोलंदाजांनी दिमाखदार कामगिरी करत टीम इंडियाला विजय मिळवून दिला. भारताने दिलेल्या २३५ धावांच्या आव्हानाचा पाठलाग करताना इिम्बाब्वेच्या संघाची सुरुवात चांगली झाली. पण नंतर एकामोगून एक विकेट पडत गेल्या.

आवेश खानने आपला इंगा दाखवत झिम्बाब्वेच्या फलंदाजांना गुडघे टेकायला लावले. आवेश खानने १५ धावा देत ३ बळी घेतले तर मुकेश कुमारने पहिला ब्रेक थ्रो मिळवून देत तीन बळी घेतले. कुमारने ३७ धावा देत झिम्बाब्वेचे ३ फलंदाज बाद केले. दुसऱ्या टी-२०मध्ये भारताने झिम्बाब्वेला हरवून मालिकेत बरोबरी केलीय. टीम इंडियाचा कर्णधार गिलने नाणेफेक जिंकून प्रथम फलंदाजी करण्याचा निर्णय घेतला. भारताने २० षटकात २३४ धावा केल्या होत्या. भारताकडून अभिषेक शर्माने १००, ऋतुराजने ७७ आणि रिंकू सिंहने ४८ धावा केल्या होत्या.

भारताने दिलेल्या २३५ धावांच्या लक्ष्याचा पाठलाग करताना झिम्बाब्वेचा संघ केवळ १३४ धावांच करु शकला. भारताकडून आवेश खान आणि मुकेश कुमार यांनी प्रत्येकी तीन बळी घेतले. रवी बिश्नोईनेही दोन गडी बाद केले.

दरम्यान सामना संपल्यानंतर टीम इंडियाचा युवा कर्णधार शुबमन गिल खूपच आनंदी दिसत होता. गिलने शतक ठोकणाऱ्या अभिषेक शर्माचे कौतुक केलं. तर अवघ्या ४६ चेंडूत शतक करणाऱ्या अभिषेक शर्माला प्लेअर ऑफ द मॅच असं घोषित करण्यात आलं. अभिषेकने २१२.७७ च्या स्ट्राईक रेटने धावा करत आंतरराष्ट्रीय टी२० क्रिकेटमधील पहिलं वहिलं शतक झळकावलं.

मी खूप आनंदी आहे, पुन्हा विजयी लयीत परतणे खूप छान आहे. अभिषेक शर्मा आणि ऋतुराज गायकवाड यांनी ज्या प्रकारे फलंदाजी केली, विशेषत: पॉवरप्लेमध्ये ते सोपे नव्हते. कारण चेंडू इकडे तिकडे फिरत होता, परंतु अभिषेक आणि ऋतुराज गायकवाड यांनी शानदार खेळी केली. पहिल्या सामन्यात दबाव हाताळता आला नाही. हा एक तरुण संघ आहे आणि त्यापैकी बरेच आंतरराष्ट्रीय अनुभवासाठी नवीन असल्याचं शुबमन गिल सामना संपल्यानंतर म्हणाला.