Asia Cup 2025 मध्ये भारत आणि पाकिस्तान हे दोन संघ पुन्हा एकदा आमनेसामने येणार आहेत. हा सुपर फोर सामना दुबई आंतरराष्ट्रीय क्रिकेट स्टेडियमवर आज (२१ सप्टेंबर) खेळला जाणार आहे. मागच्या रविवारी १४ सप्टेंबर रोजी आशिया कपमध्ये या दोन संघांमध्ये लढत झाली होती. तेव्हा भारतीय संघाने सात गडी राखत पाकिस्तानवर दणदणीत विजय मिळवला होता.

पाकिस्तानवर विजय मिळवल्यानंतर भारतीय संघ ओमानविरुद्धचा सामना जिंकला होता. या सामन्यामध्ये भारताच्या प्लेईंग ११ मध्ये दोन बदल करण्यात आले होते. जसप्रीत बुमराह आणि वरूण चक्रवर्ती यांना विश्रांती देत अर्शदीप सिंह आणि हर्षित राणा या दोघांना संधी देण्यात आली होती. आता प्लेईंग ११ मध्ये कोणाला सामील केले जाईल याकडे सर्वांचे लक्ष लागले आहे. दुसऱ्या बाजूला, भारताकडून पराभव झाल्यानंतर पाकिस्तान संघाच्या प्लेईंग ११ मध्ये बदल करण्यात आला होता. ओमानविरुद्ध हरिस रौफ आणि खुशदिल शाह यांना संघात सामील करण्यात आले. सुफियान मुकीम, फहीम अश्रफ यांना वगळण्यात आले होते.

भारताची संभाव्य प्लेईंग ११ -

अभिषेक शर्मा, शुभमन गिल, सूर्यकुमार यादव (कर्णधार), तिलक वर्मा, शिवम दुबे, हार्दिक पंड्या, संजू सॅमसन, अक्षर पटेल, कुलदीप यादव, जसप्रीत बुमराह, वरूण चक्रवर्ती.

पाकिस्तानची संभाव्य प्लेईंग ११ -

साहिबजादा फरहान, सैम अयुब, फखर जमान, सलमान अली आगा (कर्णधार), हसन नवाज, खुशदिल शाह, मोहम्मद हारिस, मोहम्मद नवाज, शाहीन शाह आफ्रिदी, हारिफ रौफ, अबरार अहमद.

टी-२० आंतरराष्ट्रीय सामन्यांमध्ये भारतीय संघाचा पाकिस्तानविरुद्ध उत्कृष्ट रेकॉर्ड आहे. एकूण १४ भारत विरुद्ध पाकिस्तान सामन्यांमध्ये ११ सामने भारताने जिंकले आहेत. उरलेल्या ३ सामन्यात पाकिस्तानचा विजय झाला. आजच्या भारत-पाकिस्तान सामन्यामध्ये संजू सॅमसन आणि हार्दिक पंड्या यांच्यावर नजर असणार आहे. जर संजूने या सामन्यात ८३ धावा केल्या, तर तो टी-२० आंतरराष्ट्रीय क्रिकेटमध्ये १००० धावा करणारा १२ भारतीय फलंदाज बनेल. दुसऱ्या बाजूला हार्दिकने जर ४ विकेट्स घेतल्या, तर तो १०० विकेट्सचा पल्ला गाठेल.