Ind Vs Eng 3rd Test च्या तिसऱ्या दिवसाला सुरुवात झाली आहे. काल (११ जुलै) ३८७ धावांवर इंग्लंडचा संघ ऑलआउट झाल्यानंतर भारताची फलंदाजी सुरु झाली. कसोटीच्या दुसऱ्या दिवसाच्या शेवटी १४५/३ अशी भारताची धावसंख्या होती. केएल राहुल (५३ धावा) आणि रिषभ पंत (१९ धावा) तिसऱ्या दिवशी फलंदाजीसाठी मैदानात उतरले.

अँडरसन-तेंडुलकर ट्रॉफीतील तिसरा सामना लॉर्ड्सवर सुरु आहे. पहिला सामना लीड्सवर खेळला गेला, हा सामना इंग्लंडने जिंकला. त्यानंतर एजबॅस्टन स्टेडियमवर सामना जिंकत टीम इंडियाने इतिहास रचला. मालिकेत दोन्ही संघ बरोबरीवर आहेत. लॉर्ड्सवर विजय मिळवत कोण मालिकेमध्ये आघाडी घेणार याकडे सर्वांचे लक्ष लागले आहेत. भारताला लॉर्ड्स कसोटी जिंकायची असेल, तर तिसऱ्या दिवशी संघाला या ३ महत्त्वाच्या गोष्टी कराव्या लागतील.

१. पहिल्या तासात विकेट न गमावणे

दुसऱ्या दिवसाच्या शेवटी केएल राहुल आणि रिषभ पंत क्रीजवर होते. भारताने ३ विकेट गमावून १४५ धावा केल्या होत्या. तिसऱ्या दिवशाच्या पहिल्या तासात विकेट पडल्यास भारतावर दबाव येऊ शकतो. त्यामुळे पहिल्या सत्राच्या पहिल्या तासात राहुल आणि पंत यांना मैदानावर टिकून राहणे आवश्यक आहे.

२. २०० हून अधिक धावांची भागीदारी

केएल राहुल आणि रिषभ पंत यांनी चौथ्या विकेटसाठी ३८ धावांची भागीदारी केली आहे. जर हे दोघे टिकून खेळले आणि त्यांनी तिसऱ्या दिवशी २०० पेक्षा जास्त धावांची भागीदारी केली, तर भारत चांगल्या स्थितीमध्ये येईल. केएल राहुल आणि रिषभ पंत यांना शतकीय कामगिरी करावी लागेल. त्यांनी २०० हून अधिक धावांची भागीदारी केल्यास लॉर्ड्सवर भारत इंग्लंडवर वरचढ ठरेल.

३. ५०० हून अधिक धावा करणे

जर भारताला लॉर्ड्स कसोटी जिंकायची असेल, तर पहिल्या डावात त्यांना किमान ५०० धावा कराव्या लागतील. भारतीय फलंदाजांचे पहिले लक्ष्य इंग्लंडच्या ३८७ धावा पार करणे असेल. जर भारतीय संघाने पहिल्या डावात ५०० धावा केल्या, तर त्यांच्याकडे १०० हून अधिक धावांची आघाडी असेल. याचा फायदा चौथा आणि पाचव्या दिवशी भारताला होईल. यामुळे इंग्लंडवर मात करणे शक्य होईल.