India vs England 5th Test, Day 3 Highlights:

धरमशालेच्या मैदानावर भारत आणि इंग्लंड या दोन्ही संघांमध्ये ५ कसोटी सामन्यांच्या मालिकेतील शेवटचा सामना सुरु आहे. या सामन्यात भारतीय खेळाडूंचा बोलबाला पाहायला मिळाला आहे. फलंदाजांनी दुसरा डाव गाजवल्यानंतर तिसऱ्या दिवशी गोलंदाजांनीही संघाला चांगली सुरुवात करुन दिली आहे. तिसऱ्या दिवसाच्या लंच ब्रेकपर्यंत भारतीय संघाने इंग्लंडच्या ५ फलंदाजांना तंबूत धाडलं आहे.

भारतीय संघाचा पहिला डाव ४७७ धावांवर संपुष्टात आला. यासह भारतीय संघाने या डावात २५९ धावांची आघाडी घेतली. या आघाडीचा पाठलाग करताना इंग्लंडला हवी तशी सुरुवात करता आलेली नाही. आर अश्विनच्या गोलंदाजीवर इंग्लंडचे फलंदाज नागिन डान्स करताना दिसून आले आहेत. तिसऱ्या दिवसाच्या लंचपर्यंत १०३ धावांवर इंग्लंडचे ५ फलंदाज माघारी परतले आहेत. भारतीय संघाकडून आर अश्विनने सर्वाधिक ४ गडी बाद केले आहेत. तर कुलदीप यादवने १ गडी बाद केला.

आपला १०० वा सामना खेळत असलेल्या आर अश्विनने डकेटची दांडी गुल करत इंग्लंडला पहिला धक्का दिला. डकेट अवघ्या २ धावा करत माघारी परतला. त्यानंतर त्याने झॅक क्रॉलीला शून्यावर बाद करत माघारी धाडलं. पोप आणि जो रुट या दोघांमध्ये चांगली भागीदारी झाली होती. मात्र ही भागीदारी तोडत आर अश्विनने पोपला १९ धावांवर बाद केलं. त्यानंतर कुलदीप यादवने जॉनी बेअरस्टोला ३९ धावांवर बाद केलं. लंचपूर्वी अश्विनने बेन स्टोक्सला २ धावांवर बाद करत माघारी धाडलं. (cricket news in marathi)

जेम्स अँडरसनच्या ७०० विकेट्स

या सामन्याच्या तिसऱ्या दिवशी जेम्स अँडरसनच्या नावे मोठ्या विक्रमाची नोंद झाली आहे. तिसऱ्या दिवसाच्या सुरुवातीच्या १५ मिनिटात जेम्स अँडरसनने कुलदीप यादवला बाद केलं. यासह त्याने कसोटी क्रिकेटमध्ये ७०० गडी बाद करण्याचा कारनामा केला आहे. असा कारनामा करणारा तो जगातील पहिलाच वेगवान गोलंदाज ठरला आहे. तर जगातील तिसरा गोलंदाज ठरला आहे.