भारताचा युवा तारा अभिषेक शर्मा पहिल्याच टी -२० सामन्यात चांगलाच चमकला. भारत आणि इंग्लंड यांच्यातील पहिला टी -२० सामना कोलकाताच्या ईडन गार्डन्सवर पार पडला. या सामन्यात इंग्लंडने दिलेल्या १३३ धावांचा पाठलाग करताना अभिषेक शर्माने वादळी सुरुवात करून दिली. दरम्यान अर्धशतक झळकावताच त्याने मोठ्या रेकॉर्डमध्ये युवराज सिंगची बरोबरी केली आहे.

या सामन्यात धावांचा पाठलाग करताना अभिषेक शर्माने ३४ चेंडूंचा सामना करत ७९ धावांची खेळी केली. त्याने आपले अर्धशतक अवघ्या २० चेंडूत पूर्ण केले. यासह तो भारतात खेळताना संयुक्तरित्या वेगवान अर्धशतक झळकावणारा तिसराच भारतीय फलंदाज ठरला आहे.

हा रेकॉर्ड करणारा तिसराच भारतीय फलंदाज

इंग्लंडविरुद्ध झालेल्या सामन्यात भारतीय संघ १३३ धावांचा पाठलाग करण्यासाठी मैदानात उतरला होता. या धावांचा पाठलाग करताना भारतीय संघाकडून संजू सॅमसन आणि अभिषेक शर्माची जोडी मैदानात आली. दोघांनीही संघाला आक्रमक सुरुवात करून दिली. संजू सॅमसन स्वस्तात माघारी परतला.

त्यानंतर अभिषेक शर्माने भार खांद्यावर घेत इंग्लंडच्या फलंदाजांचा चांगलाच समाचार घेतला. त्याने चौकार आणि षटकारांचा पाऊस पाडला. या वादळी खेळीदरम्यान त्याने ५ चौकार आणि ८ गगनचुंबी षटकार खेचले. यादरम्यान त्याने २३२.३५ च्या स्ट्राईक रेटने धावा केल्या.

या अर्धशतकासह तो भारतात खेळताना संयुक्तरित्या वेगवान अर्धशतक झळकावणारा तिसरा फलंदाज ठरला. या रेकॉर्डमध्ये त्याने आपला गुरु युवराज सिंगची बरोबरी केली आहे.

भारतासाठी मायदेशात खेळताना टी -२० आंतरराष्ट्रीय क्रिकेटमध्ये सर्वात वेगवान अर्धशतक झळकावणारे फलंदाज

सूर्यकुमार यादव -१८ चेंडू ( विरुद्ध दक्षिण आफ्रिका, २०२२)

गौतम गंभीर - १९ चेंडू ( विरुद्ध श्रीलंका, २००९)

अभिषेक शर्मा - २० चेंडू ( विरुद्ध इंग्लंड, २०२५)

युवराज सिंग - २० चेंडू ( विरुद्ध श्रीलंका, २००९)