India vs Bangladesh 1st T20I: कसोटी मालिकेत बांगलादेशला पराभूत केल्यानंतर आता टी-२० मालिकेतही भारतीय संघाने दमदार सुरुवात केली आहे. भारत आणि बांगलादेश यांच्यातील पहिला टी-२० सामना ग्वालियरच्या मैदानावर पार पडला. पहिल्या डावात भारताच्या गोलंदाजांच्या शानदार गोलंदाजीच्या बळावर बांगलादेशचा डाव अवघ्या १२७ धावांवर आटोपला. या धावांचा पाठलाग करताना भारतीय संघाने ७ गडी राखून विजय मिळवला आहे.

टीम इंडियाला जिंकण्यासाठी १२८ धावांची गरज

भारतीय संघाला हा सामना जिंकण्यासाठी १२८ धावा करायच्या होत्या. याध धावांचा पाठलाग करताना, भारतीय संघाकडून संजू सॅमसन आणि अभिषेक शर्माची जोडी मैदानात आली. दोघांनी मिळून २५ धावा जोडल्या. मात्र त्यानंतर अभिषेक शर्मा धावबाद होऊन माघारी परतला. त्यानंतर संजू सॅमसनने डाव सांभाळत २९ धावांची खेळी केली.

कर्णधार सूर्यकुमार यादवनेही तुफान फटकेबाजी करत ३ गगनचुंबी षटकार खेचत २९ धावांची खेळी केली. शेवटी हार्दिक पंड्या आणि नितीश कुमार रेड्डीने भागीदारी करत भारतीय संघाला विजय मिळवून दिला. या विजयासह भारतीय संघाने ३ सामन्यांच्या मालिकेत १-० ने आघाडी घेतली आहे.

भारतीय गोलंदाजांची शानदार गोलंदाजी

या सामन्यात भारताचा कर्णधार सूर्यकुमार यादवने नाणेफेक जिंकत प्रथम गोलंदाजी करण्याचा निर्णय घेतला. हा निर्णय सार्थ ठरवत, भारतीय गोंलदाजांनी बांगलादेशचा डाव १२७ धावांवर हाणून पाडला. बांगलादेशकडून फलंदाजी करताना, मेहदी हसन मिराजने सर्वाधिक ३५ धावांची खेळी केली. तर कर्णधार शांतोने २७ धावांची खेळी केली.

भारतीय संघाकडून गोलंदाजी करताना अर्शदीप सिंग आणि वरुण चक्रवर्तीने प्रत्येकी ३-३ गडी बाद केले. तर हार्दिक पंड्या, मयांक यादव आणि वॉशिंग्टन सुंदरने प्रत्येकी १-१ गडी बाद केला.