ICC Womens T20 World Cup Team India : आयसीसी महिला टी-२० विश्वचषक स्पर्धेत सोमवारी टीम इंडिया आणि आयर्लंड संघात अतिशय रंगतदार सामना झाला. पावसामुळे व्यत्यय आलेल्या या सामन्यात टीम इंडियाने डकवर्थ लुईस नियमानुसार आयर्लंड ५ धावांनी विजय मिळवला. या विजयासह भारताने आपलं सेमीफायनलचं तिकीट पक्कं केलं. भारताच्या विजयामुळे पाकिस्तानच्या सेमीफायनलमध्ये पोहचण्याच्या आशा पूर्णपणे धुसर झाल्या आहेत. (Latest Sports Updates)

सेमीफायनची फेरी गाठण्यासाठी भारतीय संघाला आयर्लंड विरुद्धचा सामना कोणत्याही परिस्थितीत जिंकायचा होता. अतिशय महत्वपूर्ण सामन्यात भारताने (Team India) प्रथम फलंदाजी करताना आयर्लंडसमोर विजयसाठी २० षटकांत ६ बाद १५५ धावांचं उभं केलं. या धावाचा पाठलाग करताना आयर्लंडची सुरूवात अतिशय खराब झाली.

भारताने पावरप्लेमध्ये आयर्लंडला दोन जबर धक्के दिले. त्याचाच फायदा भारताला झाला. पावसामुळे व्यत्यय आलेल्या या सामन्यात आयर्लंडला ८.२ षटकांत २ बाद ५४ धावाच करता आल्या. पावसामुळे जेव्हा खेळ थांबला तेव्हा भारत डकवर्थ लुईस नियमानुसार ५ धावांनी आयर्लंडच्या पुढे होता. याचाच फटका आयर्लंड संघाला बसला. अशा पद्धतीने भारतीय संघाने उपांत्य फेरीत धडक मारली आहे.

भारतीय संघाकडून स्मृती मंधानाने सर्वाधिक धावा केल्या.मंधानाने ५६ चेंडूचा सामना करताना ९ चौकार आणि ३ षटकाराच्या मदतीने ८७ धावांची महत्वपूर्ण खेळी केली. त्यामुळे टीम इंडियाला मोठी धावसंख्या उभारण्यात यश आले. त्याचबरोबर तिने शफाली वर्मासोबत पहिल्या विकेटसाठी महत्वाची भागीदारी केली. आयर्लंड संघाकडून गोलंदाजी करताना कर्णधार लॉरा डेलेनीने सर्वाधिक तीन विकेट घेतल्या. त्याचबरोबर ओर्ला प्रेंडरगैस्टने दोन आणि आर्लेन केलीने एक विकेट घेतली.  (Latest Marathi News)

दरम्यान, १५६ धावांच्या आव्हानाचा पाठलाग करताना, आयर्लंडने ८.२ षटकांत दोन गडी गमावून ५४ धावा केल्या. गॅबी लुईस २५ चेंडूत ३२ आणि कर्णधार एल डेलनी १७ चेंडूत २० धावांवर नाबाद राहिले. भारताकडून रेणुका सिंगने एक विकेट घेतली.

या गटातून इंग्लंडचा संघ आधीच उपांत्य फेरीत पोहोचला आहे. सध्या इंग्लंड ब गटातील गुणतालिकेत तीन सामन्यांत तीन विजय आणि सहा गुणांसह अव्वल स्थानावर आहे. त्याला शेवटचा गट सामना पाकिस्तानविरुद्ध खेळायचा आहे. अशा स्थितीत अव्वल स्थानावर असताना इंग्लंड उपांत्य फेरी गाठणार हे जवळपास निश्चित आहे.

त्याचबरोबर भारतीय संघ दुसऱ्या स्थानावर राहून उपांत्य फेरी गाठेल. इंग्लंडचा निव्वळ रन रेट +१.७७६ आहे. पाकिस्तानविरुद्धच्या पराभवानंतरही इंग्लंडचा संघ पहिल्या स्थानावर राहू शकतो. त्याच वेळी, भारताचा निव्वळ रन रेट +०.२९० आहे. ब गटातील वेस्ट इंडिज, आयर्लंड आणि पाकिस्तानचे संघ स्पर्धेतून बाहेर झाला आहे.

Edited By - Satish Daud