Umpire Bismillah Jan Shinwari Demise : क्रिकेटविश्वातून दु:खद बातमी समोर आली आहे. आंतरराष्ट्रीय दर्जाचे अंपायर बिस्मिल्ला जान शिनवारी यांचे निधन झाले आहे. ते ४१ वर्षांचे होते. अफगाणिस्तान क्रिकेट बोर्डाने यासंबंधित माहिती दिली आङे. शिनवारी यांच्या निधनाच्या बातमीने क्रिकेट जगतात शोककळा पसरली आहे.

बिस्मिल्ला जान शिनवारी हे आयसीसीच्या आंतरराष्ट्रीय अंपायर पॅनेलचे सदस्य होते. २५ वनडे आणि २१ टी-२० आंतरराष्ट्रीय सामन्यांमध्ये त्यांनी अंपायरिंग केली होती. डिसेंबर २०१७ मध्ये शारजाह येथे अफगाणिस्तान विरुद्ध आयर्लंड यांच्यात झालेल्या वनडे सामन्याद्वारे शिनवारी यांनी आंतरराष्ट्रीय कारकिर्दीची सुरुवात केली होती.

१८ फेब्रुवारी रोजी ओमान विरुद्ध यूएसए हा वनडे फॉरमॅटमधला शिनवारी यांचा शेवटचा सामना होता. त्यानंतर १८ मार्च रोजी अफगाणिस्तान विरुद्ध आयर्लंड यांच्यातील सामना अंपायर म्हणून त्यांनी काम केले होते. अफगाणिस्तान क्रिकेट बोर्डाने बिस्मिल्ला जान शिनवारी यांना श्रद्धांजली वाहत एक पोस्ट शेअर केली आहे. आजारपणामुळे शिववारी यांचे निधन झाले. ते अफगाण क्रिकेटचे खरे सेवक होते, असा उल्लेख क्रिकेट बोर्डाने केला आहे.

आयसीसीचे अध्यक्ष जय शाह यांनीही शिनवारी यांच्या निधनानंतर शोक व्यक्त केले. बिस्मिल्ला जान शिनवारी यांनी क्रिकेटसाठी खूप योगदान दिले आहे. त्यांंचे जाणे हे क्रिकेट जगतासाठी दु:खद आहे. त्यांच्या जाण्यामुळे मोठे नुकसान झाले आहे. शिनवारी यांचे कुटुंबीय आणि जवळच्या लोकांप्रती मी शोक व्यक्त करतो, असे जय शाह यांनी म्हटले आहे.