आयसीसी टी -२० वर्ल्डकप २०२४ स्पर्धेत ४ जून रोजी २ सामने खेळले गेले आहेत. पहिल्या सामन्यात इंग्लंड आणि स्कॉटलंड हे दोन्ही संघ आमनेसामने आले होते. या सामन्यात पावसाने व्यत्यय आणल्याने हा सामना पूर्ण होऊ शकला नाही. तर दुसरीकडे नेपाळविरुद्ध नेदरलँड यांच्यात झालेल्या सामन्यात नेदरलँडने एकतर्फी विजय मिळवला आहे.

इंग्लंडला मोठा धक्का

टी -२० वर्ल्डकप स्पर्धेतील एकूण एक सामना हा महत्वाचा असतो. मात्र इंग्लंड आणि स्कॉटलंड यांच्यातील सामन्यात पावसाने अडथळा निर्माण केला. त्यामुळे हा सामना पाहिल्या डावातील १० षटक झाल्यानंतर पुढे गेलाच नाही. त्यामुळे दोन्ही संघांना प्रत्येकी १-१ गुण दिला गेला आहे. प्रत्येक संघाला आपल्या ग्रुपमधून टॉप २ मध्ये पोहचण्यासाठी १-१ गुण महत्वाचा आहे. त्यामुळे हा रद्द झालेला सामना गतविजेत्या इंग्लंडचं टेन्शन वाढवू शकतो.

या सामन्याबद्दल बोलायचं झालं, तर स्कॉटलंडने नाणेफेक जिंकता प्रथम फलंदाजी करण्याचा निर्णय घेतला. स्कॉटलंडकडून फलंदाजी करताना मायकल जोन्स आणि जॉर्ज मुंसीने इंग्लंडच्या गोलंदाजांचा चांगलाच समाचार घेतला. जोन्सने नाबाद ४५ तर मुंसीने नाबाद ४१ धावा करत संघाची धावसंख्या बिनबाद ९० धावांवर पोहचवली. मात्र त्यानंतर पाऊस आल्याने हा सामना रद्द करण्यात आला.

तसेच नेदरलँड आणि नेपाळ यांच्यातील सामन्याबद्दल बोलायचं झालं तर, नेदरलँडने नाणेफेक जिंकत प्रथम गोलंदाजीचा निर्णय घेतला. प्रथम फलंदाजीसाठी आलेल्या नेपाळचा डाव १९.२ षटकात १०६ धावांवर आटोपला. या धावांचा पाठलाग करताना नेदरलँडने १८.४ षटकात दिलेलं आव्हान पूर्ण केलं आणि शानदार विजय मिळवला.