आगामी टी-२० वर्ल्डकप २०२४ स्पर्धेसाठी वेस्टइंडीजचे दिग्गज खेळाडू ब्रायन लारा यांनी भारतीय संघाची निवड केली आहे. या संघात त्यांनी रोहित शर्माची निवड केली असून युवा आणि अनुभवी खेळाडूंना स्थान दिलं आहे. या १५ सदस्यीय संघात विराट कोहली, हार्दिक पंड्या आणि जसप्रीत बुमराहसारख्या अनुभवी खेळाडूंचा समावेश आहे. तर मयांक यादव आणि यशस्वी जयस्वालसारख्या युवा खेळाडूंचा समावेश आहे.

भारतीय संघात यष्टीरक्षक फलंदाज म्हणून कोणाला स्थान मिळणार?हा तिढा सुटायचं काही नाव घेत नाहीये. ब्रायन लारा यांनी आपल्या संघात संजू सॅमसन आणि रिषभ पंतची यष्टीरक्षक फलंदाज म्हणून निवड केली आहे. तर अष्टपैलू खेळाडू म्हणून त्यांनी शिवम दुबे,हार्दिक पंड्या आणि रविंद्र जडेजाला संघात स्थान दिलं आहे. तर फिरकी गोलंदाज म्हणून त्यांनी कुलदीप यादव आणि युजवेंद्र चहलच्या जोडीला पसंती दिली आहे. यासह वेगवान गोलंदाज म्हणून त्यांनी जसप्रीत बुमराह, अर्शदीप सिंग, संदीप शर्मा आणि मयांक यादवला संघात स्थान दिलं आहे.

टी-२० वर्ल्डकप २०२४ स्पर्धेला येत्या १ जूनपासून सुरुवात होणार आहे. या स्पर्धेतील सामने वेस्टइंडीज आणि अमेरिकेत रंगणार आहेत. भारतीय संघाचा पहिला सामना ५ जून रोजी आयर्लंड संघाविरुद्ध रंगणार आहे. तर भारत आणि पाकिस्तान यांच्यातील हाय व्हॉल्टेज सामना ९ जून रोजी न्यूयॉर्कमध्ये रंगणार आहे.

असा आहे ब्रायन लारा यांनी निवडलेला १५ सदस्यीय भारतीय संघ:

रोहित शर्मा ( कर्णधार), यशस्वी जयस्वाल, विराट कोहली, सूर्यकुमार यादव, संजू सॅमसन ( यष्टीरक्षक), रिषभ पंत (यष्टीरक्षक), शिवम दुबे, हार्दिक पंड्या, रविंद्र जडेजा, कुलदीप यादव, युजवेंद्र चहल, जसप्रीत बुमराह, अर्शदीप सिंग, संदीप शर्मा, मयांक यादव