Sidra Amin Pakistan : श्रीलंकेमध्ये महिला एकदिवसीय विश्वचषक २०२५ स्पर्धा सुरु आहे. काल (५ ऑक्टोबर) स्पर्धेतील भारत विरुद्ध पाकिस्तान हा सामना कोलंबोमध्ये खेळला गेला. या महामुकाबल्यामध्ये भारताने पाकिस्तानवर ८८ धावांनी विजय मिळवला. सामन्यात पाकिस्तानच्या सिद्रा अमीनने सर्वाधिक अशा ८१ धावा केल्या. पण एका कृत्यामुळे तिच्यावर कारवाई करण्यात आली आहे.

आंतरराष्ट्रीय क्रिकेट परिषदेने आयसीसीच्या आचारसंहितेचे उल्लंघन केल्याने पाकिस्तानी क्रिकेटपटू सिद्रा अमीनला शिक्षा सुनावली आहे. सामन्यामध्ये तिने ८१ धावांची झुंझार खेळी केली. स्नेह राणाच्या गोलंदाजीवर ती बाद झाली. बाद झाल्यानंतर अमीनने रागाच्या भरात तिची बॅट जमिनीवर जोरात आदळली. या वर्तनामुळे आयसीसीने तिला शिक्षा सुनावली आहे.

आंतरराष्ट्रीय क्रिकेट सामन्यादरम्यान खेळाडू क्रिकेट उपकरणे किंवा कपडे किंवा मैदानावरील कोणत्याही मालमत्तेचे नुकसान करु शकत नाही असे म्हणत आयसीसीने आचारसंहितेच्या कलम २.२ अंतर्गत सिद्रा अमीनला दोषी ठरवले आहे. तिला एक डिमेरिट पॉइंट देखील देण्यात आला आहे. वर्षभरातला हा तिचा पहिलाच गुन्हा आहे.

मैदानावरील दोन्ही पंचांसह तिसऱ्या आणि चौथ्या पंचांनीही सिद्रा अमीनला दोषी ठरवले. तिने आपली चूक मान्य केली. त्यामुळे आयसीसीच्या सुनावणीची गरज उरली नाही. महिला विश्वचषक स्पर्धेतील भारत-पाकिस्तान सामन्यामध्ये सिद्रा अमीनने सर्वात चांगली कामगिरी केली. तिच्या व्यतिरिक्त नतालिया परवेजने ३३ धावांचे योगदान दिले.