हार्दिक पांड्याने विजय हजारे ट्रॉफीमध्ये पुन्हा एकदा आपल्या धमाकेदार खेळीनं अनेकांना आर्श्चचकित केलंय. सहा चेंडूत ३४ धावा ठोकत हार्दिकनं वेगवान शतक केलं. विजय हजारे ट्रॉफीमध्ये बडोद्याकडून खेळताना हार्दिकने विदर्भाविरुद्ध तुफानी शतक झळकावलं. राजकोटमधील खांदेरी येथील निरंजन शाह स्टेडियमवर झालेल्या या सामन्यात हार्दिक पांड्याने वादळी शतक केलं. या सामन्यात बडोद्याचे इतर फलंदाज अडचणीत असताना हार्दिकने एकहाती डाव सावरत संघाला सन्मानजनक स्थितीत नेलं.

डावाच्या सुरुवातीला हार्दिकने संयम राखत फलंदाजी केली. ४४ चेंडूमध्ये त्याने पाच चौकार आणि तीन षटकारांच्या मदतीने अर्धशतक पूर्ण केले. अर्धशतकानंतर त्याने आपल्या फलंदाजीची लय बदलली. ३८ व्या षटकापर्यंत हार्दिक ६६ धावांवर होता. त्याने विदर्भाच्या गोलंदाजांची धुलाई केली. त्याने ५ षटकार आणि १ चौकार ठोकला. अवघ्या सहा चेंडूंमध्ये हार्दिकने ३४ धावा काढत आपले शतक पूर्ण केलं.

हार्दिकने ६८ चेंडूंमध्ये हे शतक झळकावले. विशेष म्हणजे दक्षिण आफ्रिकेविरुद्धच्या टी-२० मालिकेनंतर हा त्याचा पहिलाच ५० षटकांचा स्थानिक सामना होता. या पहिल्याच डावात त्याने आपली कमाल दाखवली या डावात हार्दिकने एकूण ८षटकार आणि ४ चौकार मारले. हार्दिकनं १४३ च्या पेक्षा जास्त स्ट्राईक रेटने फलंदाजी केली.

हे शतक हार्दिक पांड्याच्या कारकिर्दीतील पहिले लिस्ट ‘ए’ शतक ठरले. आतापर्यंत ११९ लिस्ट ‘ए’ सामने खेळलेल्या हार्दिकने २३५० पेक्षा जास्त धावा केल्या आहेत. त्याने १३ अर्धशतके झळकावली आहेत. भारतीय संघाच्या निवडीआधी त्याने त्याची शानदार खेळी निवडकर्त्यांसाठी जोरदार संदेशच ठरला आहे. क्रिकेट वेबसाइट क्रिकबझच्या वृत्तानुसार, हार्दिक पांड्या आणि जसप्रीत बुमराह न्यूझीलंडविरुद्धच्या एकदिवसीय मालिकेत खेळणार नाहीत. दोन्ही खेळाडूंना विश्रांती देण्यात आल्याचे वृत्त आहे.