Gautam Gambhir Photo : टीम इंडियाचा मुख्य प्रशिक्षक गौतम गंभीर मागील काही दिवसांपासून चर्चेत आहे. काही महिन्यांपूर्वी गंभीरकडे प्रशिक्षकाची जबाबदारी सोपवण्यात आली होती. हेड कोच म्हणून नेमणूक झाल्यानंतर त्याने भारतीय संघामध्ये अनेक बदल केले होते. चॅम्पियन्स ट्रॉफीमध्ये गंभीरने जसप्रीत बुमराहच्या जागी हर्षित राणाला संधी दिली. यांसारख्या अनेक निर्णयांमुळे गंभीर चर्चेचा केंद्रबिंदू बनला आहे.

पण सध्या गंभीर त्याच्या निर्णयांऐवजी एका सोशल मीडिया पोस्टमुळे चर्चेत आला आहे. गंभीरने इन्स्टाग्रामवर फोटो पोस्ट केला आहे. या पोस्टमध्ये त्याने टीम इंडियाचे टी-शर्ट आणि हूड घातल्याचे पाहायला मिळते. त्याच्यासमोर एका वाटीमध्ये दोन गुलाबजाम दिसतात. गंभीर त्या गुलाबजामचा आस्वाद घेत असल्याचे फोटोमध्ये मिळते. या फोटोला गौतम गंभीरने 'आयुष्य छोटं आहे, त्याला गोड बनवा!' (Life is short, make it sweet!) असे कॅप्शन दिले आहे.

या फोटोवर माजी क्रिकेटपटू युवराज सिंहने कमेंट केली आहे. युवराजने 'जीजी जर आयुष्य छोटं असेल, तर तू थोडं हसू देखील शकतोस' (GG If life is short thane u can smile also) असे म्हटले आहे. युवराजच्या कमेंटला रिप्लाय करत गंभीरने 'अरे माझी पूर्वीची पोस्ट बघ जरा, तू जेव्हा माझ्या आसपास असतोस तेव्हा मी हसतो, स्माईल करतो!' (Arre see my previous post, Waise I always smile when u r around!) अशी कमेंट केली.

या फोटोवर इरफान पठाणने देखील कमेंट केली आहे. त्याने 'भाई हे दाल राईस खाल्यानंतरच आहे ना?' (Bhai ye daal rice ke baad hai?) असे म्हटले आहे. या कमेंटवर गंभीरने तु खरंच मला ओळखतोस भावा! (you know me so well brother!) अशी कमेंट केली आहे.