प्लेऑफमध्ये २ स्थानांसाठी ५ संघांमध्ये चुरशीची लढत सुरु आहे. दिल्लीच्या अरुण जेटली स्टेडियमवर झालेल्या सामन्यात दिल्ली कॅपिटल्स संघाकडून लखनऊ सुपरजायंट्स संघाला पराभवाचा सामना करावा लागला आहे. या सामन्याचा निकाल राजस्थान रॉयल्ससाठी दिलासा देणारा ठरला आहे. कारण दिल्लीच्या विजयानंतर राजस्थानचा संघ प्लेऑफसाठी पात्र ठरला आहे.

प्लेऑफमध्ये जाणारे २ संघ ठरले आहेत. आता तिसऱ्या आणि चौथ्या स्थानासाठी सनरायझर्स हैदराबाद, चेन्नई सुपर किंग्ज, रॉयल चॅलेंजर्स बंगळुरु, दिल्ली कॅपिटल्स आणि लखनऊ सुपरजायंट्स या संघांमध्ये चुरशीची लढत सुरु आहे. दरम्यान कोणते २ संघ प्लेऑफमध्ये जाऊ शकतात? जाणून घ्या.

सनरायझर्स हैदराबादला टॉप ४ मध्ये प्रवेश करण्यासाठी प्रबळ दावेदार मानलं जात आहे. कारण सनरायझर्स हैदराबादने १२ सामने खेळले आहेत. इथून पुढे या संघाला २ सामने खेळायचे आहेत. हे दोन्ही सामने जिंकून १८ गुणांसह हा संघ प्लेऑफमध्ये एन्ट्री करु शकतो. जर एक सामना गमावला, तरीदेखील हा संघ १६ गुणांसह प्लेऑफमध्ये प्रवेश करु शकतो. जर या संघाने दोन्ही सामने गमावले तरीदेखील नेट रनरेटच्या बळावर हा संघ प्लेऑफमध्ये जाऊ शकतो.

प्लेऑफमध्ये प्रवेश करण्याचा सर्वात कमी चान्स लखनऊ सुपरजायंट्स आणि दिल्ली कॅपिटल्स संघाचा आहे. कारण दिल्लीचे १४ सामने झाले आहेत. हा संघ १४ गुणांच्या पुढे जाऊ शकणार नाही. तर लखनऊने गेले दोन्ही सामने गमावले आहेत. त्यामुळे शेवटच्या सामन्यात लखनऊला मोठ्या फरकाने विजय मिळवावा लागणार आहे. यासह प्रार्थना करावी लागेल की, सीएसके, दिल्ली कॅपिटल्स आणि आरसीबीचा मोठ्या फरकाने पराभव झाला पाहिजे.

मुंबई इंडियन्स आणि चेन्नई सुपर किंग्ज या दोन्ही संघांना प्लेऑफमध्ये जाण्याची समान संधी आहे. जर चेन्नईने आरसीबीला पराभूत केलं, तर चेन्नईचा संघ प्लेऑफसाठी पात्र ठरेल. मात्र आरसीबीने हा सामना जिंकला, तर नेट रनरेटच्या आधारे कुठला तरी एक संघ प्लेऑफमध्ये जाईल. आरसीबीला प्लेऑफमध्ये जायचं असेल, तर हा सामना १८ धावांनी किंवा १८ षटकात जिंकणं गरजेचं असणार आहे.