Wazir Mohammad Death : क्रिकेट विश्वातून दु:खद बातमी समोर आली आहे. पाकिस्तानचे सर्वात वयस्कर क्रिकेटपटू वझीर मोहम्मद यांचे बर्मिंगहॅम येथे निधन झाले आहे. वयाच्या ९५ व्या वर्षी त्यांनी शेवटचा श्वास घेतला. ते पाकिस्तानी क्रिकेटपटू हनीफ, मुश्ताक आणि सादिक मोहम्मद यांचे थोरले बंधू होते. १९५२ मध्ये पहिली कसोटी मालिका खेळणाऱ्या पाकिस्तानी संघातील वझीर सर्वात वयस्कर सदस्य होते.

वझीर मोहम्मद यांनी १९५१ मध्ये कसोटी क्रिकेटमध्ये पदार्पण केले होते. भारताविरुद्ध त्यांनी पहिला कसोटी सामना खेळला. १९५२ ते १९५९ दरम्यान त्यांनी पाकिस्तानकडून २० कसोटी सामने खेळले. १९५९ मध्ये ढाका येथे ऑस्ट्रेलियाविरुद्ध त्यांनी शेवटचा कसोटी सामना खेळला. त्यांनी फक्त सात वर्षे पाकिस्तानचे प्रतिनिधित्त्व केले.

वझीर मोहम्मद यांनी २० कसोटी सामन्यांमध्ये ७.६२ च्या सरासरीने ८०१ धावा केल्या. यामध्ये त्यांनी दोनदा शतकीय कामगिरी केली. तसेच तीन अर्धशतकेही ठोकली. १०५ प्रथम श्रेणी सामन्यांमध्ये त्यांनी ४०.४० च्या सरासरीने ४,९३० धावा केल्या. यात ११ शतके आणि २६ अर्धशतकांचा समावेश आहे. ते अनेक वर्ष काउंटी क्रिकेटमध्येही सक्रीय होते.

क्रिकेटमधून निवृत्ती घेतल्यानंतर वझीर मोहम्मद यांनी पाकिस्तान क्रिकेट बोर्ड म्हणजेच पीसीबीचे सल्लागार म्हणून काम पाहिले. त्यानंतर ते ब्रिटनला गेले. पीसीबीचे अध्यक्ष मोहसीन नकवी यांनी वझीर मोहम्मद यांच्या निधनावर शोक व्यक्त केला. त्यांना श्रद्धांजली वाहताना पाकिस्तान क्रिकेट बोर्डाने निवेदन देखील जारी केले. या घटनेमुळे पाकिस्तान क्रिकेट विश्वात हळहळ व्यक्त केली जात आहे.