David Lawrence : इंग्लंडचे माजी वेगवान गोलंदाज डेव्हिड लॉरेन्स यांचे वयाच्या ६१ व्या वर्षी निधन झाले. लॉरेन्स हे इंग्लंडकडून क्रिकेट खेळणारे ब्रिटीश वंशाचे पहिले कृष्णवर्णीय क्रिकेटपटू होते. मागील काही महिन्यांपासून ते मोटर न्यूरॉन आजाराशी झुंजत होते. आज २२ जून रोजी लॉरेन्स यांची प्राणज्योत माळवली. लॉरेन्स यांना सिड या टोपणनावाने ओळखले जात असे.

तेंडुलकर अँडरसन ट्रॉफीतील पहिला भारत विरुद्ध इंग्लंड सामना सध्या सुरु आहे. या सामन्याच्या तिसऱ्या दिवशी भारत आणि इंग्लंड या दोन्ही संघातील खेळाडूंनी दंडावर काळी पट्टी बांधत डेव्हिड लॉरेन्स यांना श्रद्धांजली वाहिली. बीसीसीआयनेदेखील ट्वीट करत लॉरेन्स यांनी श्रद्धांजली वाहिली. 'लॉरेन्स यांचे रविवारी (२२ जून) निधन झाले. २०२४ मध्ये त्यांना एमएनडी आजाराचे निदान झाले होते, अशी माहिती बीसीसीआयने दिली.

डेव्हिस लॉरेन्स यांनी १९८८ ते १९९२ या कालावधीत इंग्लंडसाठी पाच कसोटी आणि एक एकदिवसीय सामना खेळला होता. पाच कसोटी सामन्यात त्यांनी १८ विकेट्स घेतल्या होत्या. लॉरेन्स यांनी १८५ प्रथम श्रेणी क्रिकेट सामन्यांमध्ये ५१५ विकेट्स आणि ११३ लिस्ट ए सामन्यांमध्ये १५५ विकेट्स घेतल्या होत्या. १९९२ मध्ये न्यूझीलंड विरुद्ध खेळताना त्यांना दुखापत झाली होती, त्यानंतर त्यांची कारकीर्द संपली.

सामन्यादरम्यान डेव्हिस लॉरेन्स यांना श्रद्धांजली वाहण्यासाठी इंग्लंडसह भारताच्या खेळाडूंनीही दंडावर काळी पट्टी बांधली. सामन्याबद्दल बोलायचे झाल्यास, तिसऱ्या दिवशी इंग्लंडचा संघ ४६५ धावांवर ऑलआउट झाला. त्यानंतर भारताची फलंदाजी सुरु झाली. सलामीसाठी यशस्वी जैस्वाल आणि केए राहुल ही जोडी उतरली. यशस्वी जैस्वाल फक्त ४ धावा करुन माघारी परतला.