Eoin Morgan Retirement : इंग्लंड संघाला २०१९ विश्वचषक जिंकवून देणाऱ्या कर्णधार ओएन मॉर्गनने सर्व प्रकारच्या क्रिकेटमधून निवृत्त होण्याचा निर्णय घेतला आहे . त्याने ट्विट करत ही माहिती दिली आहे. तसेच त्याने आपल्या मित्रांचे, कुटुंबातील सदस्यांचे, सहखेळाडूंचे आणि प्रशिक्षकाचे आभार मानले आहे.

इंग्लंडमध्ये झालेल्या २०१९ वनडे विश्वचषक स्पर्धेत त्याने मोलाची भूमिका बजावत इंग्लंड संघाला पहिला विश्वचषक जिंकून दिला होता. तसेच त्याने तीनही फॉरमॅटमध्ये इंग्लंड संघाला (England Cricket Team)मोलाचे योगदान दिले आहे.

आपल्या आंतरराष्ट्रीय कारकिर्दीत त्याने १०,८५८ धावा केल्या. यादरम्यान त्याने १६ शतके आणि ६४ अर्धशतके झळकावली आहेत. यापूर्वी २७ जून २०२२ रोजी त्याने आंतरराष्ट्रीय क्रिकेटमधून निवृत्त होण्याचा निर्णय घेतला होता. दरम्यान आता तो सर्वच प्रकारच्या क्रिकेट फॉरमॅटमधून निवृत्त झाला आहे. आता तो समालोचन करताना दिसून येऊ शकतो . (Latest Sports Updates)

अशी राहिली कारकीर्द..

अनेकांना ही बाब माहित नसावी,इंग्लंड संघासाठी खेळण्यापूर्वी ओएन मॉर्गनने आयर्लंड संघासाठी पदार्पण केले होते. २००६ मध्ये त्याला पहिल्यांदा इंग्लंडची जर्सी घालून मैदानात उतरण्याची संधी मिळाली. त्याने इंग्लंड संघासाठी २४८ वनडे सामन्यांमध्ये ३९.३ च्या सरासरीने ८४४७ धावा केल्या. यादरम्यान त्याने १४ शतके आणि ४७ अर्धशतके झळकावली.

तसेच २००९ मध्ये त्याला इंग्लंडच्या टी-२०संघात पदार्पण करण्याची संधी मिळाली. त्याने इंग्लंड संघासाठी खेळताना , ११५ टी-२० सामन्यांमध्ये २८.६ च्या सरासरीने १८०५ धावा केल्या. तर कसोटी क्रिकेटमधील १६ सामन्यांमध्ये त्याने ३०.४ च्या सरासरीने १२७८ धावा केल्या. यादरम्यान त्याने २ शतके देखील झळकावली आहेत.