Footballer Death : पॅलेस्टाईनच्या राष्ट्रीय फुटबॉल संघाचा माजी कर्णधार सुलेमान अहमद जैद अल-ओबैद याचे वयाच्या ४१ व्या वर्षी निधन झाले आहे. गाझा येथे इस्रायलच्या हल्ल्यामध्ये हा फुटबॉलपटू मारला गेल्याची माहिती समोर आली आहे. इस्रायलचे पॅलेस्टाईनध्ये हल्ले सुरुच आहेत. या हल्ल्यात सुलेमान अहमद जैद अल-ओबैदचा मृत्यू झाला. पॅलेस्टाईन फुटबॉल असोसिएशननुसार, दक्षिण गाझा पट्टीत मदतीची वाट पाहताना त्याचे निधन झाले.

सुलेमान अहमद जैद अल-ओबैदला 'पॅलेस्टाईन देशाचा पेले' म्हणून चाहते ओळखत असत. पीएफएच्या माहितीनुसार, गाझाच्या खादमत अल-शाती क्लबचे माजी स्टार फुटबॉलपटू सुलेमान अल-ओबैद यांनी पॅलेस्टाईनसाठी २४ आंतरराष्ट्रीय सामने खेळले आहेत. एकूण कारकिर्दीमध्ये त्यांनी १०० पेक्षा जास्त गोल केले आहेत.

६ ऑगस्ट रोजी दक्षिण गाझा पट्टीमध्ये सुलेमान अल-ओबैद हा मदतीची वाट पाहत उभे होते. यादरम्यान इस्रायलाने हल्ला केला. या हल्ल्यात सुलेमान अल-ओबैद मारला गेला. सुलेमान अल-ओबैद हा १९६७ पासून इस्रायलच्या ताब्यात असलेल्या वेस्ट बँकमधील अल-अमारी युथ सेंटर क्लबकडून खेळला होता. पॅलेस्टिनी फुटबॉल विश्वात तो लोकप्रिय खेळाडूंपैकी एक होता.

मिळालेल्या माहितीनुसार, ऑक्टोबर २०२३ मध्ये हमासने इस्रायलवर केलेल्या हल्ल्यामुळे गाझा युद्ध सुरु झाल्यापासून क्रीडा क्षेत्रातील तब्बल ६६२ लोक मारले गेले आहेत, तर फुटबॉल खेळाशी संबंधित ३२१ लोकांचा मृत्यू झाला आहे. हमास-शासित प्रदेशातील आरोग्य मंत्रालयाच्या माहितीनुसार, इस्रायलच्या हल्ल्यांमध्ये गाझातील किमान ६१,२५८ लोक मारले गेले आहेत. अधिकृत आकडेवारीनुसार, २०२३ च्या इस्रायली हल्ल्यात १,२१९ लोक मारले गेले होते.