भारतीय संघाने आयसीसी चॅम्पियन्स ट्रॉफीतील फायनलमध्ये पोहोचवलं आहे. या स्पर्धेत भारताचा मधल्या फळीतील फलंदाज श्रेयस अय्यरने दमदार खेळ करुन दाखवला आहे. भारतीय संघ जेव्हा जेव्हा अडचणीत सापडला आहे, तेव्हा तेव्हा श्रेयस अय्यरने संघाला संकटातून बाहेर काढलं आहे.

गेल्या वर्षी श्रेयस अय्यरला श्रेयस अय्यरला सेन्ट्रल कॉन्ट्रॅक्टकडून काढण्यात आलं होतं. आता चॅम्पियन्स ट्रॉफी स्पर्धेतील कामगिरी पाहून बीसीसीआय श्रेयस अय्यरला मोठं सरप्राईज देण्याच्या तयारीत आहे.

भारतीय संघातून बाहेर असताना, देशांतर्गत क्रिकेट खेळण्याला नकार दिल्याने श्रेयसवर बीसीसीआयने कारवाई केली होती. त्याला सेन्ट्रल कॉन्ट्र्रॅक्टमधून बाहेर करण्यात आलं होतं. मात्र टाईम्स ऑफ इंडियाने दिलेल्या वृत्तानुसार, श्रेयस अय्यरला पुन्हा एकदा सेन्ट्रल कॉन्ट्रॅक्ट मिळू शकतो.

मात्र त्याला कुठल्या कॅटेगरीचा कॉन्ट्रॅक्ट मिळणार, हे अजूनही स्पष्ट होऊ शकलेलं नाही. यासह आणखी एक मोठी अपडेट समोर येत आहे. केएल राहुल, रिषभ पंत आणि अक्षर पटेलला यांचं देखील प्रमोशन होऊ शकतं. अक्षर पटेल आणि रिषभ पंत हे दोघे बी कॅटेगरीत आहेत. तर केएल राहुल ए कॅटेगरीत आहेत.

बीसीसीआयच्या ए प्लस कॅटेगरीत ४ खेळाडूंचा समावेश

बीसीसीआयने ए प्लस, ए, बी आणि सी कॅटेगरी ठरवली आहे. बीसीसीआयने ठरवलेल्या ए प्लस कॅटगरीत कर्णधार रोहित शर्मा, विराट कोहली, रविंद्र जडेजा आणि वेगवान गोलंदाज जसप्रीत बुमराह या ४ खेळाडूंचा समावेश आहे.

तर बीसीसीआयच्या ए कॅटेगरीत मोहम्मद सिराज, मोहम्मद शमी, शुभमन गिल, केएल राहुल आणि आर अश्विन यांचा समावेश आहे. या यादीत असलेले ४ खेळाडू अजूनही आंतरराष्ट्रीय क्रिकेट खेळत आहेत. तर आर अश्विनने आंतरराष्ट्रीय क्रिकेटला रामराम करण्याचा निर्णय घेतला आहे.

अय्यरची दमदार कामगिरी

श्रेयस अय्यरने गेल्या काही महिन्यांपासून दमदार कामगिरी करुन दाखवली आहे. यादरम्यान त्याने ४ अर्धशतकं झळकावली आहेत. ऑस्ट्रेलियाविरुद्धच्या सामन्यात त्याने ४५ धावांची खेळी केली होती. तर न्यूझीलंडविरुद्धच्या सामन्यात त्याने ७९ धावा केल्या होत्या. पाकिस्तानविरुद्धच्या सामन्यात त्याने ५६ धावा केल्या होत्या.