आयसीसी टी-२० वर्ल्डकप २०२४ स्पर्धेतील सुपर ८ फेरीतील सामन्यात भारत आणि बांगलादेशचा सामना झाला होता. या सामन्यात बांगलादेश संघातील वेगवान गोलंदाज आणि संघाचा उपकर्णधार तस्कीन अहमद खेळू शकला नव्हता. तो या सामन्यात उपस्थित नसल्याने अनेकांना आश्चर्याचा धक्का बसला होता. मात्र याबाबत मोठा खुलासा करण्यात आला आहे. भारतीय संघाविरुद्धच्या सामन्यात तो झोपला होता. त्यामुळे त्याला भारतीय संघाविरुद्धच्या सामन्यात खेळण्याची संधी मिळाली नव्हती. त्यानंतर त्याला खेळाडू आणि टीम मॅनेजमेंटची माफी मागावी लागली होती. (Taskin Ahmed)

भारतीय संघाविरुद्ध झालेला सामना हा बांगलादेशच्या दृष्टीने अतिशय महत्वाचा होता. या सामन्यासाठी कर्णधाराने प्लेइंग ११ मध्ये ६ गोलंदाजांना स्थान दिलं होतं. वेगवान गोलंदाज म्हणून हसन साकिब आणि मुस्तफिजूर रहमान या गोलंदाजांना संघात स्थान दिलं गेलं होतं. या सामन्यात भारतीय फलंदाजांनी बांगलादेशच्या गोलंदाजांची चांगलीच धुलाई केली होती. या सामन्यात बांगलादेशला ५० धावांनी पराभवाचा सामना करावा लागला होता. भारतीय संघाने पहिल्या डावात फलंदाजी करताना ६ गडी बाद १९६ धावा केल्या होत्या.

क्रिकबझच्या वृत्तानुसार, बांगलादेशच्या एका अधिकाऱ्याने खुलासा केला आहे की, भारतीय संघाविरुद्धच्या सामन्यावेळी तस्कीन अहमद हॉटेलमध्ये झोपा काढत होता. त्याला फोन करुनही त्याने फोन उचलले नव्हते. मात्र त्याला प्लेइंग ११ मध्ये स्थान का दिलं गेलं नाही, याबाबत कुठलाही खुसाला करण्यात आलेला नाही.

अधिकाऱ्याने दिलेल्या माहितीनुसार, ' तस्कीनची टीम बस हुकली होती. त्यानंतर तो संघासोबत जोडला गेला होता. तस्कीनला भारतीय संघाविरुद्धच्या सामन्यात संधी मिळणार होती की नाही, याचं उत्तर हेड कोच देऊ शकतात. '