क्रिकेट वर्तुळातून या सर्वात वाईट बातमी समोर आलीय. जीममध्ये वर्कआऊट करताना 22 वर्षीय युवा खेळाडूचं हृदयविकाराच्या झटक्याने निधन झालंय. त्यामुळे क्रिकेटपटूच्या कुटुंबियांवर दु:खाचा डोंगर कोसळलाय. ही घटना बंगालमध्ये घडली असून क्रिकेट वर्तुळात हळहळ व्यक्त केली जातेय. प्रियजीत घोष असं हार्ट अटॅकमुळे मृत्यू झालेल्या क्रिकेटपटूचं नाव आहे.

प्रियजीतला बंगालकडून रणजी ट्रॉफीत खेळावं हे या युवा खेळाडूचं स्वप्न होतं. मात्र या युवा खेळाडूचे स्वप्न अधुरं राहिलं. प्रियजीत हा पश्चिम बंगालमधील बीरभूम जिल्ह्यातील बोलापूरमध्ये राहणारा होता. प्रियजीत याने क्रिकेट करिअरची सुरुवात जिल्हा स्तरावरुन केली होती. मात्र वयाच्या 22 व्या वर्षीच प्रियजीतने जगाचा निरोप घेतला.

प्रियजीत फिट राहण्यासाठी जीममध्ये जायचा. प्रियजीत नेहमीप्रमाणे शुक्रवारी १ ऑगस्टला बोलपूरमधील जीममध्ये गेला होता. वर्कआऊट दरम्यान छातीत दुखू लागलं. त्यानंतर प्रियजीतची तब्येत बिघडली. त्यानंतर जीममधील उपस्थितांनी त्याला रुग्णालयात नेलं. मात्र प्रियजीतचा मृत्यू झाला.

रणजी ट्रॉफी स्पर्धेत बंगालचे प्रतिनिधित्व करण्याची संधी मिळावी, असं प्रियजीतचं स्वप्न होतं.प्रियजीत प्रयत्नांची पराकाष्ठा करत होता. प्रियजीतने २०१८-१९ या मोसमादरम्यान अंडर १६ स्पर्धेत सर्वाधिक धावा करण्याचा कारनामा केला होता. क्रिकेट असोसिएशन ऑफ बंगालकडून या स्पर्धेचं आयोजन करण्यात आलं होतं. प्रियजीतला या स्पर्धेतील कामगिरीसाठी पदक देऊन सन्मानित करण्यात आले होते. आघाडीच्या फलंदाजांपैकी एक अशी प्रियजीतची बंगालमध्ये ख्याती होती.