Viral Video : सोशल मीडियावर एक व्हिडीओ प्रचंड व्हायरल होत आहे. या व्हिडीओमध्ये लग्नाच्या कार्यक्रमामध्ये काहीजण नाचत असल्याचे पाहायला मिळते. कार्यक्रमामध्ये नाचत असताना स्टेजवर एक महिला कोसळते. या महिलेचा स्टेजवर कोसळल्यानंतर मृत्यू झाल्याची माहिती समोर आली आहे. हा धक्कादायक प्रकार तामिळनाडूमध्ये घडला आहे.

मिळालेल्या माहितीनुसार, मंगळवारी (१९ ऑगस्ट) रात्री तामिळनाडूच्या चेंगलपट्टू जिल्ह्यातील ममल्लापुरम येथे एका लग्नच्या रिसेप्शनमध्ये नाचताना एका महिलेचा मृत्यू झाला. रिसेप्शनमध्ये डान्स सुरु असताना महिलेला स्टेजवर बोलवण्यात आले होते. तेव्हा ही महिला स्टेजवर गेली आणि नाचताना स्टेजवरच कोसळली. या महिलेचे नाव जीवा असे आहे.

कांचीपुरम येथील रहिवासी जीवा आणि तिचे पती ज्ञानम हे त्यांच्या मित्राच्या मुलाच्या लग्नात एका खासगी कार्यक्रमासाठी गेले होते. या निमित्ताने लोकप्रिय तमिळ पार्श्वगायक वेलमुरुगन यांचा संगीताचा कार्यक्रम आयोजित करण्यात आला होता. तेव्हा वेलमुरुगन यांनी प्रेक्षकांना स्टेजवर यायला सांगितले. तेव्हा जीवा स्टेजवर गेल्या होत्या.

स्टेजवर नाचताना जीवा अचानक कोसळल्या. त्यांच्यावर प्राथमिक उपचार करण्यात आले. पण शुद्धीवर न आल्याने त्यांना जवळच्या रुग्णालयात नेण्यात आले. तेथील डॉक्टरांनी जीवा यांना मृत घोषित केले. या संपूर्ण घटनेचे फुटेज सोशल मीडियावर व्हायरल होत आहेत. जीवा यांचा मृत्यू कोणत्या कारणांमुळे झाला याची माहिती अद्याप अस्पष्ट आहे.