पश्चिम बंगालमधील फाल्टा पोटनिवडणुकीत भाजपने दणदणीत विजय मिळवला आहे. भाजपचे उमेदवार देबांशु पांडा हे एक लाखांहून अधिक मतांनी विजयी झालेत. पांडा यांनी तब्बल १,०९,०२१ मतांच्या फरकाने विजय मिळवला. सीपीआय(एम)चा उमेदवार दुसऱ्या क्रमांकावर आला. भाजपच्या विजयावर मुख्यमंत्री सुभेंदू अधिकारी यांचे वक्तव्यही समोर आले आहे. फाल्टामधील विजयावर सुभेंदू अधिकारी म्हणाले, "मी फाल्टाच्या जनतेला सलाम करतो." टीएमसीचे उमेदवार जहांगीर खान यांनी या निवडणुकीतून आधीच माघार घेतली होती.

रविवारी कडक सुरक्षा व्यवस्थेत मतमोजणीला सुरुवात झाली. मतमोजणीत जनतेने एकतर्फी भाजपवर विश्वास दाखवल्याचे दिसत आहे. या यशानंतर भाजपमध्ये जल्लोषाचे वातावरण आहे. प्रवक्ते प्रदीप भंडारी यांनी एक्सवर लिहिले की, 'डायमंड हार्बर मॉडेल कोसळले असून "भाईयो" चा अहंकार हरला आहे. सुवेंदू अधिकारींचे नेतृत्व आणि पीएम मोदींच्या व्हिजनमुळे जनतेने भाजपला निवडले.'

फाल्टामध्ये २९ एप्रिल रोजी मुख्य मतदान झाले होते. मात्र ईव्हीएममध्ये फेरफार आणि काही बूथवर ईव्हीएमवर अत्तर आणि चिकट टेप वापरल्याच्या तक्रारी आल्या होत्या. वेब कॅमेऱ्यांच्या फुटेजमध्येही छेडछाड आढळून आल्यानं निवडणूक आयोगाने २९ एप्रिलचे मतदान रद्द केले होते. यानंतर सर्व २८५ बूथवर २१ मे रोजी पुन्हा मतदानाचा आदेश दिला होता. या पुनर्मतदानासाठी केंद्रीय दलाच्या ३५ कंपन्या तैनात करण्यात आल्या होत्या.