उत्तराखंडच्या देहरादूनमध्ये गेल्या काही दिवसांपासून मुसळधार पाऊस बरसत आहे. ढगफुटीसदृश्य पावसामुळे परिसरात हाहाकार माजला आहे. देहरादूनमध्ये २४ तासांनंतर एकूण सात जणांचे मृतदेह बाहेर काढण्यात आले आहे. मृतांची संख्या आता २२ वर पोहोचली आहे. १५ जण अजूनही बेपत्ता असल्याची माहिती आहे. एसडीआरएफ आणि एनडीआरएफने सहस्त्रधारा परिसरात बचावकार्य सुरू आहे. परंतु, ढिगाऱ्याखाली दबलेल्या लोकांचा अद्याप शोध लागलेला नाही.

१५ आणि १६ सप्टेंबर रोजी देहरादूनमध्ये मुसळधार पाऊस पडला होता. नद्या ओढ्यांना आलेल्या पुरामुळे मोठ्या प्रमाणात जीवितहानी झाली. मंगळवारी प्रशासनाने १३ जणांचा मृ्त्यू तर, १६ जण बेपत्ता असल्याची माहिती दिली. बुधवारी प्रशालनाने मृत आणि बेपत्ता लोकांची यादी जाहीर केली. या यादीतून १८ जणांचा मृत्यू तर, १५ जण बेपत्ता असल्याची माहिती आहे.

१६ सप्टेंबर रोजी १३ जणांचे मृतदेह सापडले. विकासनगरमधील रहिवासी दोन महिला आणि एका तरूणाचे मृतदेह सहारनपुरात सापडले. तर, बुधवारी शिमला बायपास परिसरात एका तीन वर्षांच्या मुलाचा मृतदेह आढळला. तर, रायपूर परिसरातील सौंग नदीत २ तरूणांचे मृतदेह आढळले. मात्र, दोघांची ओळख अद्याप पटलेली नाही.

ढगफुटी सदृश्य पावसामुळे देहरादूनमध्ये ६२ रस्ते आणि एकूण आठ पूल खराब झाल्याची माहिती आहे. सार्वजनिक बांधकाम मंत्री सतपाल महाराज म्हणाले की, यापैकी ३५ रस्ते पुन्हा सुरू करण्यात आले आहे. २७ रस्ते पुन्हा सुरू करण्याचे काम चालू आहे. तर, मालदेवतापासून २० किलोमीटर अंतरावर असलेल्या फुलेत गावात बुधवारी सकाळी बचावकार्य सुरू झाले. तर, रस्ते बांधकाम करणारे कर्मचारी अद्याप सापडलेले नाहीत. त्यांचा शोध सुरू आहे.