सुप्रीम कोर्टाचे ज्येष्ठ वकील शिंदेंना कोर्टात चक्कर, रूग्णालयात ह्रदयविकाराच्या झटक्यानं निधन, पुण्यात अंत्यसंस्कार

दिल्लीहून एक दुख:द बातमी समोर येत आहे. सुप्रिम कोर्टाचे ज्येष्ठ वकील सिद्धार्थ शिंदे यांचे ह्रदयविकाराच्या झटक्याने निधन झाले आहे. दिल्लीतील एम्स रूग्णालयात त्यांच्यावर उपचार सुरू होते. मात्र, काल त्यांची ४९व्या वर्षी प्राणज्योत मालवली. त्यांच्या निधनानंतर कायदा क्षेत्रासोबतच सामाजिक क्षेत्रात शोककळा पसरली आहे. आज त्यांचं पार्थिव वैकुंठ स्मशानभूमीत आणले जाईल, तसेच अंत्यसंस्कार केले जाईल.

सिद्धार्थ शिंदे यांना सोमवारी न्यायालयात अचानक भोवळ आली. सहकाऱ्यांनी त्यांना तातडीने दिल्लीतील एम्स रूग्णालयात नेले. तेथे त्यांच्यावर उपचार सुरू होते. मात्र, उपचार सुरू असतानाच त्यांनी प्राण सोडले. त्यांच्या निधनानंतर शिंदे कुटुंबावर दुखा:चा डोंगर कोसळला आहे.

सिद्धार्थ शिंदे या माजी केंद्रीय कृषिमंत्री अण्णासाहेब शिंदे यांचे ते नातू होते. राज्यात शिंदेंची वेगळीच ओळख होती. ते फक्त वकील नसून, कायद्याचे विश्लेषणसुद्धा ते सोप्या भाषेत सामान्यांना समाजावून सांगायचे. शिंदे एक मार्गदर्शक देखील होते.

मराठा आरक्षण असो किंवा राज्यातील सत्तासंघर्ष, यांसारख्या महत्वाच्या सुनावण्यांवेळी त्यांनी सुप्रिम कोर्टातील युक्तिवाद आणि अचूक माहिती लोकांपर्यंत पोहोचवली. त्यांच्या अकाली निधनानंतर कायद्याच्या क्षेत्रात अभ्यासू व्यक्तिमत्व हरपल्याची भावना व्यक्त केली जात आहे.