Uttarakhand News: उत्तराखंडच्या उत्तराकाशीमध्ये भीषण अपघात (Uttarakhand Accident) झाला आहे. गंगोत्रीधामवरुन परतणाऱ्या भाविकांवर काळाने घातला. ३३ भाविकांनी भरलेली बस दरीमध्ये कोसळली. या भीषण अपघातामध्ये ७ भाविकांचा जागीच मृत्यू झाला. तर २८ जण जखमी झाले असून त्यांना रेस्क्यू करण्यात आले आहे.

मिळालेल्या माहितीनुसार, हा अपघात गंगोत्री हायवेवर गंग्नानीजवळ झाला आहे. ३३ प्रवाशांना घेऊन बस गंगोत्रीवरुन उत्तरकाशीच्या दिशेने जात होती. त्याचवेळी चालकाचे बसवरील नियंत्रण सुटले आणि बस दरीमध्ये कोसळली. जिल्हा प्रशासनाने दिलेल्या माहितीनुसार, आतापर्यंत २८ जखमींना रेस्क्यू करण्यात आले आहे. तर ७ जणांचा मृतदेह बाहेर काढण्यात आले आहेत.

घटनास्थळी स्थानिकांच्या मदतीने पोलीस बचावकार्य करत आहेत. या अपघातामध्ये जखमी झालेल्यांना तात्काळ नजीकच्या रुग्णालयात दाखल करण्यात आले आहे. घटनास्थळी बचावकार्य युद्धपातळीवर सुरु आहे.

गंगोत्री धामला दर्शन घेऊन हे भाविक परत येत होते. त्याचवेळी गंग्नानीजवळ संरक्षण कठडा तोडून बस दरीत कोसळली. भागिरती नदीच्या काठावर असणाऱ्या झाडा झुडपामध्ये ही बस अडकली. त्यामुळे बसमधील अनेक प्रवासी बचावले. या अपघातामध्ये बसचे मोठे नुकसान झाले आहे. उत्तराखंडचे मुख्यमंत्री पुष्कर सिंह धमी यांनी अपघाताची माहिती मिळाल्याबद्दल दु: ख व्यक्त केले आहे.