देशभरात भाजपविरोधात इंडिआ आघाडीनं रान पेटवलंय. त्याचदरम्यान भाजपनं काँग्रेसचा मित्रपक्ष समाजवादी पक्षाला मोठा धक्का दिलाय. उत्तर प्रदेशातील २०२७ च्या विधानसभा निवडणुकांसाठी भाजपकडून मोर्चेबांधणी केली जातेय. त्याचपार्श्वभूमीवरसमाजवादी पक्षाच्या ३ बंडखोर आमदारांचा अधिकृतपणे भाजपमध्ये प्रवेश करून घेतलाय. भाजपमध्ये सामील झालेल्या या आमदारांमध्ये राकेश प्रताप सिंग (गौरीगंज मतदारसंघ, अमेठी), अभय सिंग (गोसाईगंज मतदारसंघ, अयोध्या) आणि विनोद चतुर्वेदी (कल्पी मतदारसंघ, जालौन) यांचा समावेश आहे.

या पक्षप्रवेशाच्या कार्यक्रमाला माजी केंद्रीय मंत्री स्मृती इराणी, भाजपचे प्रदेशाध्यक्ष पंकज चौधरी, मागासवर्गीय मोर्चाचे राष्ट्रीय अध्यक्ष अमरपाल मौर्य आणि मंत्री दारा सिंह चौहान यांच्यासह अनेक ज्येष्ठ नेते उपस्थित होते. बुधवारी अमेठीतील गौरीगंज येथे आमदार राकेश प्रताप सिंह यांचे निवासस्थानी हा पक्षप्रवेशाचा कार्यक्रम पार पडला.

भाजपमध्ये प्रवेश केल्यानंतर 'एएनआय'शी बोलताना गौरीगंजचे समाजवादी पक्षाचे आमदार राकेश प्रताप सिंह म्हणाले की, "मी माझ्या मतदारसंघातील त्या जनतेचे आभार मानतो. ज्यांनी मला पाठिंबा दिला आणि मला भाजपमध्ये सामील होण्याचा आग्रह केला." ते माझ्यासोबत आहेत. ज्यांनी आपापल्या बूथवर विजय मिळवला होता किंवा पराभव स्वीकारला होता, त्यापैकी ९८टक्के लोक समाजवादी पक्ष सोडून भाजपमध्ये सामील होतील, असा दावाही आमदार राकेश प्रताप सिंह यांनी केलाय.

आमदार राकेश सिंग यांनी पुढे सांगितले की, आमदार विनोद चतुर्वेदी, अभय सिंग आणि ते स्वतः भाजपमध्ये सामील होणार आहेत. त्यांच्यासोबत विद्यमान आणि माजी लोकप्रतिनिधींसह सुमारे १,००० लोक भाजपमध्ये प्रवेश करतील. यावेळी मंचावर साधारणपणे डझनभर आमदार उपस्थित असतील. आमदारांच्या या भाजप प्रवेशाच्या कार्यक्रमासाठी हजारो समर्थक घटनास्थळी दाखल झाले होते.