प्रयागराजमध्ये सुरू असलेल्या महाकुंभ मेळ्यामध्ये पुन्हा भीषण आग लागल्याची घटना घडली. त्यामुळे एकच खळबळ उडाली आहे. या आगीमध्ये १२ पेक्षा अधिक तंबू जळून खाक झाले आहेत. छतनाग घाटजवळील नागेश्वर घाट सेक्टर २२ मधील टेंट सिटीमध्ये ही आग लागली. हा घाट झुंसीच्या दिशेने जाणाऱ्या छतनागजवळ महाकुंभ मेळ्याच्या काठावर आहे.

खासगी कंपनीने उभारलेल्या वैदिक टेंट सिटीमध्ये ही आग लागली. या आगीमध्ये कोणतिही जीवितहानी झाली नाही. आग लागल्याची माहिती मिळताच अग्निशमन दलाचे कर्मचारी घटना स्थळी दाखल झाले आहेत. आग विझवण्याचे शर्थीचे प्रयत्न सुरू आहेत. आगीचे कारण अद्याप अस्पष्ट आहे.

याआधी १९ जानेवारीला महाकुंभ मेळ्यात आग लागली होती. गोरखपूरमधील गीता प्रेसच्या कॅम्पमध्ये आग लागली होती. त्यानंतर दीडशेहून अधिक तंबू जळून खाक झाले होते. शास्त्री पुलाजवळ सेक्टर १९ मध्ये गीता प्रेसच्या कॅम्पला ही आग लागली होती. छोट्या गॅस सिलेंडरमधून झालेल्या गळतीमुळे ही आग लागली असल्याची माहिती पोलिसांनी दिली होती. पण गीता प्रेसच्या लोकांनी ही आग बाहेरून लागल्याचे कारण सांगितले होते.

मागच्या वेळी आग लागली होती तेव्हा राज्याचे मुख्यमंत्री योगी आदित्यनाथ प्रयागराजमध्ये होते. आज जेव्हा ही आग लागली तेव्हा राज्याचे दोन्ही मोठे अधिकारी, मुख्य सचिव मनोज कुमार सिंह आणि डीजीपी प्रशांत कुमार महाकुंभ मेळा परिसरात होते. कालच्या चेंगराचेंगरीमागील कारणांचा शोध घेण्यासाठी दोन्ही अधिकारी दाखल झाले आहेत. या चेंगराचेंगरीत ३० जणांचा मृत्यू झाला होता. तर ६० पेक्षा अधिक जण जखमी झाले आहेत. ३६ जणांवर वैद्यकीय महाविद्यालयातच उपचार सुरू आहेत.