Chandra Shekhar Azad First Reaction on Attack: भीम आर्मीचे प्रमुख चंद्रशेखर आझाद यांना गुरुवारी सहारनपूर येथील रुग्णालयातून डिस्चार्ज देण्यात आला. रुग्णालयातून डिस्चार्ज मिळाल्यानंतर त्यांनी सरकार आणि प्रशासनावर जोरदार निशाणा साधला आहे. सरकारच्या संरक्षणाशिवाय हा हल्ला होऊ शकत नाही, असा आरोप त्यांनी केला आहे.

चंद्रशेखर यांनी गुरुवारी रुग्णालयातून बाहेर येताच माध्यमांशी संवाद साधला. ते म्हणाले की, ''हा आजचा हल्ला नाही, वंचितांवर शतकानुशतके हल्ले होत आहेत, पण आज कायद्याचे राज्य आहे. माझ्यासारख्या माणसाच्या बाबतीत हे घडत असताना कायदा आणि सुव्यवस्थेची काय स्थिती आहे?'' यादरम्यान आझाद यांनी विचारले की, गेल्या २४ तासांत काय कारवाई करण्यात आली?

ते म्हणाले की, आरोप अद्यापही मोकाट फिरत आहेत. ''सत्तेच्या संरक्षणाशिवाय हे घडू शकत नाही. याकडे शासनाचे दुर्लक्ष आहे. या घटनेवर मुख्यमंत्री काही न बोलल्याने ते गुन्हेगारांना संरक्षण देत असल्याचं स्पष्ट होतं.'' प्रशासनावर निशाणा साधत ते म्हणाले की, ''मी राणीचा मुलगा नाही, हे आयुक्तांचे कुत्र्याचे प्रकरण नाही, ज्यावर तातडीने कारवाई केली जाईल.'' (Latest Marathi News)

आझाद यांच्या कारवर झाला होता गोळीबार

दरम्यान, भीम आर्मीचे प्रमुख चंद्रशेखर आझाद यांच्यावर बुधवारी सहारनपूरमध्ये दिल्लीत परतत असताना हल्ला झाला. कारमधून आलेल्या हल्लेखोरांनी त्यांच्या कारवर गोळीबार केला. गोळीबारात एक गोळी चंद्रशेखर यांच्या गाडीच्या दारात घुसली. तर एक गोळी कारच्या काचेवर लागली. गोळीबाराची माहिती मिळताच पोलिसांनी (Police) घटनास्थळी धाव घेतली होती.

पोलिसांनी दिलेल्या माहितीनुसार, हल्लेखोर हरियाणा क्रमांकाच्या कारमध्ये आले होते. त्यांनी चंद्रशेखर आझाद यांच्या कारसमोर गाडी लावली. काही कळण्याच्या आतच हल्लेखोरांनी गोळीबार सुरू केला. हल्लेखोरांनी यावेळी एकूण चार राऊंड फायर केले. या घटनेनं मोठी खळबळ उडाली होती.