उत्तर प्रदेश: सहारनपूरमध्ये स्थानिक पत्रकार सुधीर सैनी यांच्या हत्येच्या घटनेने खळबळ उडाली आहे. कारच्या बाजूच्या वादातून झालेल्या भांडणात सुधीर यांना आपला जीव गमवावा लागला. घटनेनंतर वरिष्ठ पोलीस अधिकारी घटनास्थळी पोहोचले होते. पत्रकाराचा मृतदेह ताब्यात घेऊन पोस्टमार्टमसाठी पाठवण्यात आला आहे. यामध्ये पोलिसांनी दोन आरोपींना अटक केली आहे.

वृत्तानुसार पत्रकार सुधीर सैनी हे सहारनपूरच्या कोतवाली ग्रामीण पोलीस स्टेशनच्या चिलकाना रोडवरून मोटारसायकलवरून सहारनपूरला येत होते. तेथून सुधीर यांची ओव्हरटेकिंगवरून कारमधील तीन तरुणांशी बाचाबाची झाली. त्यानंतर कारमधील तरुणांनी सुधीर यांना मारहाण करण्यास सुरुवात केली.

या जबर मारामारीत सुधीर यांना दुखापत झाली, त्यातच त्यांचा मृत्यू झाला आहे. सुधीर सैनी यांच्या हत्येप्रकरणी पोलिसांनी तत्परतेने कारवाई सुरू केली. प्रत्यक्षदर्शींनी दिलेल्या कारच्या क्रमांकावरून कार थांबवली आणि कार ताब्यात घेऊन पोलिसांनी दोन हल्लेखोरांना अटक केली आहे.

पोलिसांनी मृत सुधीरचा पंचनामा करून शवविच्छेदनासाठी पाठवला आणि कार्यवाही सुरू केली आहे. एसएसपी आकाश तोमर यांनी सांगितले की, रोड रेजमध्ये पत्रकार सुधीर सैनी यांच्या हत्येतील आरोपींना पोलिसांनी तात्काळ अटक केली आहे. तसेच आरोपींवर कारवाई केली जाईल.