Uttar Pradesh Cabinet Expansion:

उत्तर प्रदेशातील योगी आदित्यनाथ सरकारचा पहिल्या मंत्रिमंडळ विस्तार झाला आहे. राज्यपाल आनंदी बेन पटेल यांनी नव्या चार मंत्र्यांना पद आणि गोपनियतेची शपथ दिली. नव्या मंत्रिमंडळामध्ये भाजपचे आमदार दारा सिंह चौहान, आमदार सुनील शर्मा तसेच भारतीय समाज पक्षाचे अध्यक्ष ओपी राजभर आणि राष्ट्रीय लोकदलाचे आमदार अनिल कुमार यांनी मंत्रीपदाची शपथ घेतली.

योगी आदित्यनाथ (Yogi Adityanath) सरकारच्या मंत्रिमंडळ विस्ताराची चर्चा अनेक दिवसांपासून सुरू होती, नुकतेच ओपी राजभर यांनी तर मंत्रीपद न दिल्यास होळी साजरी करणार नाही, असा इशारा दिला होता त्यानंतर आता मंत्रीमंडळ विस्तार पार पडला. या चार नवीन चेहऱ्यांसह योगी सरकारच्या आता मंत्रिमंडळात 57 मंत्री झाले आहेत. यामध्ये 25 चेहरे सर्वसाधारण गटातील, 21 ओबीसी, 10 एससी-एसटी आणि एक मुस्लिम नेते मंत्री आहेत.

मुख्यमंत्र्यांकडून अभिनंदन

आज उत्तर प्रदेश सरकारमध्ये मंत्री म्हणून शपथ घेतलेल्या सर्व सहकाऱ्यांचे हार्दिक अभिनंदन! 'मोदींची गॅरंटी' वास्तवात आणून 'विकसित उत्तर प्रदेश'चा संकल्प साकार करण्यात तुम्ही सर्वजण महत्त्वाची भूमिका बजावाल, असा पूर्ण विश्वास आहे.तुम्हा सर्वांना तुमच्या उज्ज्वल कार्यकाळासाठी माझ्या हार्दिक शुभेच्छा!, अशा शब्दात मुख्यमंत्री योगी आदित्यनाथ यांनी नव्या सहकाऱ्यांचे स्वागत केले.

दरम्यान, लोकसभा निवडणुकीच्या पार्श्वभूमीवर योगी मंत्रिमंडळाचा हा विस्तार महत्त्वाचा मानला जात आहे. पूर्वांचलवर सत्ता मिळवण्यासाठी भाजपने दारा सिंह चौहान आणि ओपी राजभर यांना मंत्री केले असल्याचे मानले जात आहे. याआधीही राजभर हे योगी सरकारमध्ये मंत्री होते, मात्र योगी आदित्यनाथ यांच्याशी मतभेद झाल्याने राजभर यांना मंत्रिमंडळाचा राजीनामा द्यावा लागला होता.

('साम टीव्ही'चं व्हॉट्सअँप चॅनल जॉईन करण्यासाठी येथे क्लिक करा)