दक्षिण आफ्रिकेतील दोन मोठ्या शहरांजवळ शनिवारी गोळीबाराच्या घटनांमध्ये 27 जणांचा मृत्यू झाला तर 15 जण गंभीर जखमी झाले आहेत. पोलिसांनी रविवारी या घटनांची माहिती दिली. पहिली घटना जोहान्सबर्गच्या नैऋत्येला असलेल्या वेडेला टाउनशिपमध्ये शनिवारी रात्री घडली. याठिकाणी काही नागरिक बसले होते. त्यांच्यावर काही आज्ञातानी अचानक अंदाधुंद गोळीबार केला. या हल्ल्यात 17 जणांचा मृत्यू झाला.

पोलिसांनी दिलेल्या माहितीनुसार, AK-47 रायफल आणि पिस्तूलांनी आठ संशयितांनी मद्यपान करणाऱ्या नागरिकांवर गोळीबार केला. त्यानंतर संशयित एका माॅलमध्ये घुसले आणि तेथेही लोकांवर गोळीबार केला. या घटनेतील सर्व 17 जणांचा मृत्यू घटनास्थळीच झाल्याचे आपत्कालीन वैद्यकीय पथकाने सांगितले. मृतांमध्ये 13 पुरुष आणि चार महिलांचा समावेश आहे. तर गोळीबारात जखमी झालेल्या 15 जणांना उपचारासाठी रुग्णालयात दाखल करण्यात आले आहे.

रविवारपर्यंत या प्रकरणात कोणालाही अटक करण्यात आलेली नव्हती. गोळीबारामागील कारण अद्याप स्पष्ट झालेले नाही. संशयितांचा शोध घेण्यासाठी पोलिसांनी तपास सुरू केला आहे.

विशेष म्हणजे, काही दिवसांपूर्वीच दक्षिण आफ्रिकेतील डर्बन शहराजवळ एका घरातील पार्टीत झालेल्या गोळीबारात 11 जणांचा मृत्यू झाला होता. मृतांमध्ये एका गर्भवती महिलेचाही समावेश होता. सलग घडलेल्या या गोळीबाराच्या घटनांमुळे दक्षिण आफ्रिकेतील नागरिकांच्या सुरक्षेचा प्रश्न पुन्हा ऐरणीवर आला असून देशात भीतीचे वातावरण पसरले आहे.