नीट पेपरफुटीवरून दिल्लीमध्ये आंदोलक चांगलेच आक्रमक झाले असून जोपर्यंत सरकार शिक्षणमंत्री धर्मेंद्र प्रधान यांचा राजीनामा घेत नाही तो पर्यंत आम्ही इथून हलणार नाही असा निर्धार तरुणांनी व्यक्त केला आहे. तसेच सोनम वांगचुक यांचे उपोषण सुरू असताना त्यांना उचलून रुग्णालयात नेण्यात आले. उपोषण सुरू असताना त्यांना असे हॉस्पिटलमध्ये नेणे म्हणजे दडपशाही आहे असा आरोप त्यांच्या पत्नीने केला होता. तसेच त्यांनी दिल्ली हाय कोर्टात याचिका देखील दाखल केली.

यामध्ये त्यांनी सोनम वांगचुक यांना उपचार खासगी रुग्णालयात देण्यात यावे. यावरच मंगळवारी झालेल्या सुनावणीत केंद्र सरकारने स्पष्ट केले की, सोनम वांगचुक यांना दिल्लीतील सफरदरजंग रुग्णालयातून गुरुग्राममधील मेडांता रुग्णालयात हलवण्यास त्यांची कोणतीही हरकत नाही. मात्र, हा निर्णय पूर्णपणे डॉक्टरांच्या सल्ल्यानुसारच घ्यावा, रुग्णाच्या इच्छेनुसार नव्हे, अशी भूमिका केंद्र सरकारने मांडली.

जनरल तुषार मेहता यांनी सांगितले की, वांगचुक यांना सफरदरजंगहून मेडांतात हलवण्यास सरकारला कुठलीही अडचण नाही. मात्र त्यांचा डिस्चार्ज हा डॉक्टरांच्या सल्ल्यानेच व्हावा, त्यांच्या स्वतःच्या इच्छेवर अवलंबून नसावा. त्यांनी यावेळी वांगचुक यांच्या आजूबाजूच्या काही लोकांबाबत चिंता व्यक्त करत सांगितले की, काही जण त्यांच्या प्रकृतीकडे दुर्लक्ष करून त्यांना रुग्णालयातून बाहेर काढण्याचा प्रयत्न करत आहेत. दोन्ही बाजूचे म्हणणे ऐकल्यानंतर दिल्ली उच्च न्यायालयाने या प्रकरणातला निकाल दिला असून वांगचुक यांना मेडाता यांना रुग्णालयात हलवण्यास परवानगी दिली आहे. ही सुनावणी वांगचुक यांच्या पत्नी गीतांजली आंगमो यांनी दाखल केलेल्या याचिकेवर झाली.

दरम्यान, सोनम वांगचुक सध्या सफदरजंग रुग्णालयात उपचार घेत असून, त्यांच्यावर डॉक्टरांच्या विविध तज्ज्ञांच्या पथकाकडून देखरेख ठेवली जात आहे. नीट आंदोलनाच्या पार्श्वभूमीवर सुरू असलेल्या उपोषणादरम्यान त्यांना रुग्णालयात दाखल करण्यात आलं होतं. रुग्णालयाने सोमवारी सायंकाळी जारी केलेल्या आरोग्य अहवालानुसार, त्यांची प्रकृती स्थिर आहे.