बिहारमधील मुझफ्फरपूर जिल्ह्यातून एक खळबळजनक घटना समोर येत आहे. आईच्या अवैध संबंधांमुळे संतप्त झालेल्या तरुणाने तिच्या प्रियकराची हत्या करून मृतदेह शेतात पुरून टाकल्याचा धक्कादायक प्रकार उघडकीस आला आहे. आरोपी तरुण अविनाश याला पोलिसांनी अटक केली असून त्याने गुन्ह्याची कबुली दिली आहे. या घटनेनंतर परिसरात खळबळ उडाली आहे.

अविनाश असे आरोपीचे नाव आहे. ही धक्कादायक घटना मुझफ्फरपूरमधील तुर्की पोलीस स्टेशन परिसरात घडली आहे. मृत तरूण ७ मे पासून बेपत्ता होता. मृत तरूणाच्या पत्नीने २० मे रोजी बेपत्ता झाल्याची तक्रार दाखल केली. पोलिसांनी तपास केला असता मृतदेह सापडला. पोलिसांनी सांगाडा बाहेर काढत शवविच्छेदनासाठी पाठवले आहे.

नेमकं प्रकरण काय?

आरोपी अविनाशची आई आणि जितूचे गेल्या अनेक वर्षांपासून अवैध संबंध होते. ही बाब अविनाशला काही पटलेली नाही. पाच वर्षांपूर्वी अविनाशने आपल्या आईला जितूसोबत आक्षेपार्ह स्थितीत पाहिले. यामुळे त्याला मानसिक धक्का बसला. ७ मे रोजी जितू त्याच्या घरी गेला होता. रात्री १२ वाजता त्याने घरात घुसण्याचा प्रयत्न केला. यादरम्यान दोघांमध्ये भांडण झालं.

भांडणाचं रूपांतर हाणामारीत झालं. त्यानंतर जितू शेताकडे पळून गेला. अविनाशही त्याच्या मागे पळाला आणि लाकडी बांबूने त्याचं डोकं फोडलं. यात जितू गंभीर जखमी झाला आणि त्याचा जागीच मृत्यू झाला. यानंतर अविनाश धावत घरी गेला आणि कुदळ घेऊन आला. तिथेच एक खड्डा खोदला आणि जितूचा मृतदेह तिथेच पुरला. त्याने जितूचा मोबाईल फोन तोडून झुडपात फेकला, जेणेकरून कोणताही पुरावा उरू नये.

जितू ७ मेपासून बेपत्ता होता. अनेक दिवस शोध घेतल्यानंतर २० मे रोजी त्याच्या पत्नीने तुर्की पोलिस ठाण्यात तक्रार दाखल केली. २३ मे रोजी गावातील काही नागरिकांनी शेतात जमिनीतून मानवी पाय बाहेर येताना पाहिल्यावर पोलिसांना माहिती दिली. पोलिसांनी घटनास्थळी जाऊन शेत खोदल्यावर मृतदेह सापडला, जो कपड्यांवरून आणि बेल्टवरून जितूचा असल्याचे ओळखण्यात आले.

गुन्ह्याची कबुली

पोलिस तपासात अविनाशवर संशय घेण्यात आला. चौकशीत त्याने संपूर्ण गुन्हा कबूल केला. पोलिसांनी हत्येत वापरलेला कुदळ आणि जितूचा मोबाईल फोन जप्त केला आहे. या प्रकरणावर एसडीपीओ अनिमेश चंद्र ग्यानी यांनी सांगितले की, “मृताच्या पत्नीने २० मे रोजी तक्रार दाखल केल्यानंतर तपास सुरू झाला. तपासादरम्यान जितू राम याचे एका विवाहित महिलेशी अवैध संबंध असल्याचे समोर आले. आरोपीने गुन्हा कबूल केला असून त्याला तुरुंगात पाठवण्यात आले आहे.”