West Bengal breaking news : पश्चिम बंगालमधील वीरभूम जिल्ह्यातील प्रसिद्ध तारापीठ मंदिराजवळ एका चार मजली हॉटेलला सोमवारी पहाटे ४ वाजताच्या सुमारास भीषण आग लागली. या दुर्दैवी घटनेत हॉटेलमध्ये झोपलेल्या ६ जणांचा होरपळून दुर्दैवी मृत्यू झाला आहे. तर अनेक जण जखमी झाले आहेत. श्रावण सोमवार असल्याने तारापीठ मंदिरात दर्शनासाठी मोठी गर्दी झाली होती. त्याचवेळी मंदिराच्या जवळच असणाऱ्या हॉटेलमध्ये पहाटे ४ वाजता ही दुर्घटना घडली.

मिळालेल्या माहितीनुसार, आगीची सुरुवात हॉटेलच्या रिसेप्शन भागातून झाली आणि काही वेळातच ती संपूर्ण इमारतीत पसरली. रिसेप्शनमध्ये फायबरचे काम केलेले असल्याने आग अधिक वेगाने भडकली आणि परिसरात गडद काळा धूर पसरला. धुराचे लोट जास्त असल्याने बचाव पथकाला आत जाण्यात अडचणी येत होत्या.

प्राथमिक अंदाजानुसार शॉर्ट सर्किटमुळे ही आग लागल्याचा संशय वर्तवण्यात येत आहे. सध्या जखमींना तातडीने रुग्णालयात दाखल करण्यात आले आहे आणि बचाव कार्य वेगाने सुरू आहे.

पश्चिम बंगालमधील स्थानिक माध्यमांच्या वृत्तानुसार, दुर्घनटाग्रस्त हॉटेल तारापीठ पोलीस ठाण्याजवळ आहे. हॉटेल मालकाचा दावा आहे की शॉर्ट सर्किटमुळे आग लागली. पण अद्याप आगीच्या कारणाबाबत कोणतेही अधिकृत माहिती समोर आलेली नाही.

पोलिसांनी या प्रकरणी गुन्हा दाखल केला असून पुढील तपास केला जात आहे. हॉटेलमधील आगीत जळून मृत्यू झालेल्या लोकांची ओळख पटवण्याचे काम सुरू आहे. पोलिसांनी मृतदेह पोस्टमार्टमसाठी सरकारी रूग्णालयात पाठवले आहेत.

एबीपी बंगालीशी बोलताना भाविकांनी सांगितले की, हॉटेलमध्ये अचानक धूर पसरला आणि लोक पळू लागले. गडद काळ्या धुरामुळे पोलीस किंवा अग्निशमन दलाला घटनास्थळी प्रवेश करता आला नाही. रिसेप्शनची अंतर्गत रचना फायबरची बनलेली होती, त्यामुळे आग वेगाने पसरली. अग्निशामन दलाकडून आगीवर नियंत्रण मिळवण्यात आले असून सध्या कुलिंगचे काम सुरू आहे.