बंगळूर : भगवद्‌गीता जेव्हा सामान्य जनतेसाठी सुलभ भाषेत सादर केली जाते, तेव्हा ती समाजासाठी मार्गदर्शक शक्ती म्हणून काम करू शकते. आरएसएस नसते, तर हिंदूंना देशात आणखी मोठ्या आव्हानांचा सामना करावा लागला असता, असं वक्तव्य राष्ट्रीय स्वयंसेवर संघाचे सरसंघचालक मोहन भागवत यांनी केलं आहे. रविवारी उडुपी मठातील गीता मंदिर येथे आयोजित कार्यक्रमात ते बोलत होते.

उडुपी मठात त्यांची पूज्य सुगुणेंद्र तीर्थ स्वामी यांच्याशी सौहार्दपूर्ण भेट झाली. यादरम्यान मोहन भागवत यांनी भागवत गीतेचा संदेश देण्यासाठी 'अनुभव मंडपम' या अनुभव नाट्यगृहाचे उद्घाटनही केले. यावेळी मोहन भागवत म्हणाले की, गीता ही जीवनात पुढे जाण्यासाठी मार्गदर्शक आहे, ती म्हातारपणी वाचावी असे पुस्तक नाही. ही मूल्ये बालपणापासूनच दैनंदिन जीवनात रुजवली पाहिजेत.

सनातन धर्माचे जतन प्रत्येक हिंदूने, पालनपोषण आणि संवर्धन केले पाहिजे. तसंच त्यांच्या वचनबद्धतेबाबत खंबीर राहिले पाहिजे, यावर राष्ट्रीय स्वयंसेवर संघाचे सरसंघचालक मोहन भागवत यांनी भर दिला. त्याचबरोबर धार्मिक नेते आणि संतांना आध्यात्मिक मूल्ये आणि राष्ट्रीय आदर्शाचे समर्थन करण्यासाठी समाजाला अधिक प्रभावीपणे मार्गदर्शन करण्याचेही आवाहन त्यांनी केले.

पुढे बोलताना मोहन भागवत म्हणाले की, युद्ध असो किंवा इतर कोणतीही परिस्थिती भगवान कृष्णाने अर्जुनाला आव्हानांना सामोरे जाण्याचा आणि त्यांच्यापासून पळून न जाण्याचा सल्ला दिला. प्राचीन काळापासून चालत आलेली विचारसरणी पूर्णत्वाला पोहोचली आहे. गीतेनंतर भारतात आणि जगात आलेल्या विचारप्रवाहांचा अभ्यास केला तर लक्षात येते की हे सर्व गीतेमध्ये आधीच आहे. ही पुस्तके आयुष्यात पुढे जाण्यासाठी मार्गदर्शक आहेत, असंही त्यांनी सांगितलं.

दरम्यान, मठाचे स्वामीजी सुगुणेंद्र तीर्थ स्वामीजी यांनी भागवत यांना 'हिंदू सम्राट' या पदवीने सन्मानित केले. सनातन धर्माच्या रक्षणासाठी दिलेल्या योगदानाबद्दल त्यांना 'श्रीकृष्ण गीतानुग्रह पुरस्कार' प्रदान केला. सुगुणेंद्र तीर्थ स्वामीजी यांनी 'आरएसएस'च्या योगदानाचे कौतुक केले. मुकुंदमठाचे दिवाण एम. नागराज आचार्य आदी संघाचे ज्येष्ठ नेते उपस्थित होते.