मध्य प्रदेशच्या सतना जिल्ह्यातील नागौद येथील राजघराण्यात रक्तरंजित थरार घडला आहे. माजी मंत्री, भाजप आमदार नागेंद्र सिंह यांचे पुतणे बाबा राजा यांच्या पत्नी योगिता सिंह यांच्यावर गोळीबार झाल्याची घटना घडली आहे. योगिता सिंह यांच्या पोटात गोळी झाडण्यात आली. या गोळीबारात जखमी झालेल्या योगिता सिंह यांना तातडीने रुग्णालयात दाखल करण्यात आलं.

योगिता यांना सुरुवातीला सतना येथील रुग्णालयात दाखल करण्यात आलं होतं. सतना येथील रुग्णालयात प्राथमिक उपचार घेतल्यानंतर त्यांना रीवा येथील विंध्य रुग्णालयात दाखल करण्यात आलं. त्यांच्यावर उशिरा रात्री शस्त्रक्रिया करून पोटात अडकलेली गोळी काढण्यात आली. रुग्णालयात शस्त्रक्रिया केल्यानंतरही त्यांची प्रकृती चिंताजनक असल्याचे सांगण्यात येत आहे.

प्राथमिक तपासात सुनिता सिंह यांनी गोळीबार केल्याचा आरोप आहे. सुनीता यांचे बाबा राजा यांच्याशी जवळचे संबंध असल्याचा दावा केला जात आहे. घटनेची माहिती मिळताच पोलीस आणि प्रशासकीय अधिकारी घटनास्थळी पोहोचले. पोलिसांनी कारवाई करत आरोपी महिलेला अटक केली आहे. गोळीबारानंतर पोलिसांनी घटनास्थळी मोठा बंदोबस्त ठेवण्यात आला आहे.

गोळीबाराच्या घटनेने संपूर्ण शहरात खळबळ उडाली आहे. या घटनेची स्थानिक नागरिकांमध्ये जोरदार चर्चा होत आहे. पोलीस अधिकाऱ्यांनी तपासाला सुरुवात केली आहे. पोलीस अधिकारी रघू केशरी यांनी सांगितलं की, पोलिसांनी गुन्हा नोंदवून तपास सुरू केला आहे'. तर योगिता सिंह यांच्या आई नरेंद्र कुमारी यांनी घटनेचा निषेध करत आरोपींवर कडक कारवाईची मागणी केली आहे.