उत्तर प्रदेश, दिल्ली, महाराष्ट्रात कडक उन्हाने नागरिकांच्या अंगाची लाही लाही होत आहे. अनेक राज्यात पारा ४० डिग्रीपर्यंत पोहोचला आहे. तर काही ठिकाणी उष्णतेच्या लाटेचा इशारा देण्यात आला आहे. काही राज्यांसाठी पावसाचा अलर्ट देण्यात आला आहे. महाराष्ट्रालाही अवकाळी पावसाचा इशारा देण्यात आला आहे.

जम्मू-काश्मीर, लडाखमध्ये पाऊस आणि बर्फवृष्टी होण्याची शक्यता आहे. तसेच ५० किमी प्रति तासाने वारा वाहण्याची शक्यता आहे. १७-१९ एप्रिलदरम्यान हिमाचल प्रदेश, १७ एप्रिल रोजी उत्तरांखंडमध्ये हलक्या स्वरुपाचा पाऊस होण्याची शक्यता आहे. जम्मू-काश्मीर, लडाख, हिमाचल प्रदेशमध्ये गारपीट होण्याची शक्यता आहे.

हवामान विभागाने दिलेल्या माहितीनुसार, अरूणाचल प्रदेशमध्ये १५, १८,१९ एप्रिल, मेघालयात १७ आणि १८ एप्रिल, नागालँडमध्ये १८ एप्रिलमध्ये विजांच्या कडकडाटासह पावसाची शक्यता आहे. या व्यतिरिक्त मध्य, पूर्व, पश्चिम आणि दक्षिण भारतातील काही भागांत उष्णतेची लाट येण्याची शक्यता आहे. तर १५ एप्रिल रोजी आसाम आणि मेघालयमध्ये गारपिटीची शक्यता आहे. दक्षिण भारतात १८, १९ एप्रिल रोजी अंतर्गत कर्नाटकात मेघगर्जनेसह पावासाची शक्यता आहे. १७ आणि १८ एप्रिल रोजी आंध्र प्रदेशात पावसाची शक्यता आहे. पश्चिम भारतातील १८-२१ एप्रिल दरम्यान मध्य महाराष्ट्रात पावसाची शक्यता आहे.

विदर्भात उष्णतेने गाठला कडेलोट

विदर्भात सूर्यदेव अक्षरशः कोपल्याचे दिसत आहे. एप्रिलच्या मध्यातच उष्णतेने कडेलोट गाठलाय. यामुळे जनजीवन अक्षरशः होरपळून निघत आहे. विदर्भातील बहुतांश शहरांमध्ये तापमान ४२ ते ४४ अंशांच्या दरम्यान पोहोचलंय. सर्वाधिक तापमान अकोल्यात नोंदवलं गेलं असून पारा तब्बल ४४.२ अंशांवर गेलाय.

अमरावतीत ४४ अंश, वर्ध्यात ४३.९ आणि नागपुरात ४३.४ अंश तापमानाची नोंद झाली आहे. चंद्रपूर आणि गडचिरोलीमध्ये ४२.६, तर यवतमाळमध्ये ४२.८ अंश तापमान नोंदवलं गेलं.