दिल्लीच्या लाल किल्ल्याजवळ भीषण बॉम्बस्फोट झाला. या बॉम्बस्फोटामुळे १२ लोकांना प्राण गमवावे लागले. विविध एजन्सीद्वारे या घटनेचा तपास सुरू आहे. या स्फोटाचा संबंध जम्मू आणि काश्मीरशी जोडला गेला आहे. सध्या एजन्सींकडून संशयितांचा शोध सुरू आहे. स्फोटानंतर जम्मू आणि काश्मीर पोलिसांनी ५०० ठिकाणी छापे टाकले. तसेच ६०० जणांना ताब्यात घेतलं आहे. जमात ए इस्लामीविरूद्ध ही छापेमारी करण्यात आली आहे. एजन्सींचे म्हणणे आहे की, 'आम्हाला माहिती मिळाली होती की, जमात ए इस्लामी जम्मू आणि काश्मीरमध्ये पुन्हा स्वत:ला स्थापित करण्याच्या तयारीत आहेत. त्यानंतरच ही कारवाई करण्यात आली'.

अधिकाऱ्यांनी दिलेल्या माहितीनुसार, श्रीनगर, पुलवामा, शोपियान, बारामुल्लासह अनेक जिल्ह्यांमध्ये छापे टाकण्यात आले आहेत. तीन सरकारी कर्मचाऱ्यांसह सुमारे १० जणांना चौकशीसाठी ताब्यात घेण्यात आलंय.

दरम्यान, 'डॉक्टर मॉड्यूल' म्हणून ओळखल्या जाणाऱ्या नेटवर्कवरही कारवाई करण्यात आली आहे. गुरूवारी अधिकाऱ्यांनी दिलेल्या माहितीनुसार, तीन सरकारी कर्मचाऱ्यांसह एकूण १० जणांना चौकशीसाठी ताब्यात घेण्यात आले आहे. रात्रीच्या वेळी छापे टाकून तपासकर्त्यांनी अनंतनाग, पुलवामा आणि कुलगाम जिल्ह्यातून संशयितांना ताब्यात घेतले, असं अधिकाऱ्यांनी सांगितले.

चौकशीतून असे उघड झाले की, काही संशयित गेल्या वर्षी तुर्कीला गेले होते. स्फोटकांच्या मोठ्या साठ्याबाबत पोलिसांनी डॉक्टरांसह सात जणांना अटक केली आहे. दरम्यान, तपासकर्त्यांनी 'व्हाईट कॉलर टेररिस्ट' मॉड्यूलशी संबंधित २०० हून अधिक व्यक्तींची चौकशी केलीये. या महिन्याच्या सुरूवातीला पोलिसांनी अटक केलेल्या २ दहशतवादी कार्यकर्त्यांनी दिलेल्या माहितीच्या आधारे हे मॉड्यूल उघडकीस आले.

जम्मू आणि काश्मीरमधील कुलगाममध्ये २०० आणि श्रीनगरमध्ये १५० ठिकाणी छापे टाकण्यात आले आहेत. बारामुल्लाच्या सोपोरमध्ये पोलिसांनी ३० ठिकाणी छापे टाकले. छाप्यादरम्यानस अतिरेकी साहित्य, बंदी घातलेल्या संघटनांचे पोस्टर्स आणि गॅझेट्स जप्त करण्या आले आहे. एजन्सींच्या माहितीनुसार, जमात ए इस्लामी पुन्हा जम्मू काश्मीरमध्ये सक्रीय होऊन अतिरेकी विचारसरणीला खतपाणी घालण्याचा प्रयत्न करीत आहेत. या पार्श्वभूमीवर तपास आणि कारवाईला वेग आला आहे.