पंजाबमधील प्रसिद्ध अभिनेत्रीच्या वडिलांवर धाडधाड गोळीबार करण्यात आला आहे. काही अज्ञात हल्लेखोरांनी मिळून त्यांच्यावर गोळ्या झाडल्या. ही धक्कादायक घटना पंजाबच्या मोगा जिल्ह्यातील कोट इसे खान या परिसरात घडली असून, अभिनेत्रीचे वडील व्यावसायाने डॉक्टर आहेत. हल्ला झाल्यानंतर पोलिसांना याची माहिती देण्यात आली. पोलिसांनी गुन्हा नोंद केला असून, पुढील तपास सुरू आहे. या घटनेनंतर परिसरात खळबळ उडाली आहे.

पंजाबची अभिनेत्री तानिया कंबोज यांचे वडील डॉ. अनिल जीत सिंग यांच्यावर गोळीबार करण्यात आला. घटनेच्या दिवशी डॉ. अनिल जीत सिंग हे आपल्या क्लिनिकमध्ये काम करत होते. यादरम्यान, काही हल्लेखोर मोटारसायकलवरून आले. त्यांनी पिस्तूल काढत त्यांच्यावर गोळ्या झाडल्या. नंतर तेथून थेट पळ काढला.

गोळीबारानंतर स्थानिकांनी घटनास्थळी धाव घेतली. तसेच डॉ. कंबोज यांना तात्काळ रूग्णालयात दाखल केलं. सध्या त्यांची प्रकृती चिंताजनक असल्याची माहिती आहे. ही संपूर्ण घटना नर्सिंग होम परिसरात घडली असून, सीसीटीव्ही कॅमेऱ्यात कैद झाली आहे. पोलिसांनी सीसीटीव्ही फुटेज ताब्यात घेतले असून, सीसीटीव्हीच्या आधारे पोलिसांकडून तपास सुरू आहे.

पोलिसांनी दिलेल्या माहितीनुसार, 'डॉ. कंबोज यांच्या क्लिनिकमध्ये हल्लेखोर आले. त्यांनी अचानक डॉक्टरांवर हल्ला चढवला. हल्ल्यानंतर हल्लेखोरांनी पळ काढला', अशी माहिती पोलिसांनी दिली. या घटनेनंतर डॉ. कंबोज यांची मुलगी अभिनेत्री तानियाने एक भावनिक पोस्ट शेअर केली आहे.

'माझ्या वडिलांवर हल्ला करण्यात आला. त्यांची प्रकृती सध्या चिंताजनक आहे. भावनिकदृष्ट्या आम्ही फार कठिण काळातून जात आहोत. कृपया कुठलीही अफवा पसरवू नका. आम्हाला शांतता हवी', असं म्हणत तानियाने वडिलांवर झालेल्या हल्ल्याबाबत माहिती दिली.