बिहारच्या राजकारणात पुन्हा एकदा बैठकांचे सत्र सुरू झाल्याने राजकीय वातावरण चांगलेच तापले आहे. दिल्लीपासून पटण्यापर्यंत झालेल्या महत्त्वाच्या बैठकांमुळे राज्यात मोठ्या राजकीय उलटफेराच्या चर्चांना वेग आला आहे. दरम्यान आगामी काळात बिहारच्या राजकारणात काय बदल होणार हे पाहणं महत्त्वाचं ठरेल.

मिळालेल्या माहितीनुसार, बुधवारी दिल्लीतील सुनहरी बाग येथील निवासस्थानी जेडीयूचे राष्ट्रीय अध्यक्ष नीतीश कुमार यांनी पक्षाच्या खासदारांची बैठक घेतली. कार्यकारी अध्यक्ष संजय झा यांच्या उपस्थितीत झालेल्या या बैठकीत खासदारांनी आपल्या मतदारसंघातील विकासकामांची माहिती दिली. तसेच संसदेत बिहारशी संबंधित प्रश्न आणि विकासाच्या मुद्द्यांवरही चर्चा करण्यात आली.

याचदरम्यान आरजेडीचे कार्यकारी राष्ट्रीय अध्यक्ष आणि विरोधी पक्षनेते तेजस्वी यादव यांनीही पक्षाच्या वरिष्ठ नेते व खासदारांची बैठक घेतली. आगामी राजकीय रणनीती, बिहारमधील महत्त्वाचे प्रश्न आणि संसदेत जनहिताचे मुद्दे प्रभावीपणे मांडण्याबाबत या बैठकीत चर्चा झाली. नीतीश कुमार यांच्या सलग बैठकींच्या पार्श्वभूमीवर तेजस्वींची बैठकही चर्चेचा विषय ठरली आहे.

दरम्यान, पटण्यात मुख्यमंत्री सम्राट चौधरी यांच्या अध्यक्षतेखाली कॅबिनेट बैठक पार पडली. बैठक संपल्यानंतर चौधरी यांनी केवळ भाजपच्या कोट्यातील मंत्र्यांची आपल्या निवासस्थानी स्वतंत्र बैठक बोलावली. या बैठकीत JDU, HAM आणि RLM च्या मंत्र्यांना सहभागी करण्यात आले नसल्याचे सांगितले जात आहे. बंद दाराआड झालेल्या चर्चेनंतर काही मंत्री माध्यमांपासून माध्यमांना टाळून मागच्या दरवाजातून बाहेर पडले. त्यामुळे या बैठकीमागे नेमके काय राजकीय गणित आहे, याबाबत तर्क-वितर्कांना उधाण आले आहे. मात्र, सध्या कोणत्याही मोठ्या राजकीय निर्णयाची अधिकृत घोषणा झालेली नाही.