दिल्ली, ता. १ जुलै २०२४

एकीकडे राज्याच्या पावसाळी अधिवेशनात सत्ताधारी- विरोधकांमध्ये घमासान पाहायला मिळत असतानाच संसदेतही इंडिया आघाडी विरुद्ध एनडीए सरकारमध्ये जुगलबंदी पाहायला मिळत आहे. आज राज्यसभेत राष्ट्रपतींच्या अभिभाषणावर बोलताना विरोधी पक्षनेते मल्लिकार्जुन खरगे यांनी पंतप्रधान मोदींवर जोरदार टीका केली.

राज्यसभेतील विरोधी पक्षनेते आणि काँग्रेसचे अध्यक्ष मल्लिकार्जुन खरगे यांनी आज राष्ट्रपतींच्या अभिभाषणाला उत्तर दिले. यावेळी मल्लिकार्जुन खरगे यांनी पंतप्रधान नरेंद्र मोदींसह एनडीए सरकारवर जोरदार हल्लाबोल केला. "कभी घमंड मत करना, तकदीर बदलती रहती है. शीशा वही रहता है, तस्वीर बदलती रहती है," अशा खास शायराना अंदाजात खरगे यांनी मोदी सरकारचे वाभाडे काढले.

काय म्हणाले मल्लिकार्जून खरगे?

"2024 ची निवडणूक भाजपचा गर्व संपवणारी निवडणूक होती, म्हणूनच 17 मंत्र्यांचा पराभव झाला. मागील सरकारचे 17 मंत्री निवडणुकीत पराभूत झाले. शेतकऱ्यांना जीपने पायदळी तुडवणाऱ्या मंत्र्याला हटवण्याची मागणी आम्ही करत होतो. पण जनतेने त्यांना पायदळी तुडवले आणि ते संपले. आता 400 पारचा नारा द्यायची गरज नाही. 400 पारचा नारा दिला पण तरीही निवडणुकीचा निकाल तुमच्या बाजूने आला नाही," असे ते म्हणाले.

"जेव्हा आम्ही पेपर लीक आणि बेरोजगारीबद्दल बोलतो तेव्हा मोदीजी मंगळसूत्र आणि मुजऱ्याबद्दल बोलतात. जेव्हा आपण महागाईबद्दल बोलतो तेव्हा भाजप परदेशातील महागाईबद्दल बोलू लागतो. जेव्हा विरोधक जनतेबद्दल बोलतात तेव्हा मोदीजी त्यांच्या मनातले बोलू लागतात. ते फक्त त्यांची मन की बातमध्ये व्यस्त असतात," असे म्हणत मल्लिकार्जून खरगे यांनी भाजप सरकारवर टीका केली.