पाकिस्तानमधून मोठी बातमी समोर आली आहे. पाकिस्तानच्या उत्तर-पश्चिम भागातील खैबर पख्तूनख्वा प्रांतात झालेल्या भीषण हल्ल्यात १२ पाकिस्तानी जवानांसह एकूण १५ जणांचा मृत्यू झाला. अफगाणिस्तान सीमेलगत असलेल्या टँक जिल्ह्यातील लष्करी आणि पोलिस सुरक्षा चौकीवर हा हल्ला करण्यात आला. या घटनेनंतर पाकिस्तानी सुरक्षा दलांनी तातडीने कारवाई करत १२ दहशतवाद्यांचा खात्मा केल्याची माहिती पाकिस्तानी लष्कराने दिली आहे.

लष्कराच्या माहितीनुसार, गुरुवार आणि शुक्रवारच्या मध्यरात्री दहशतवाद्यांनी सुरक्षा चौकीवर मोठ्या प्रमाणात हल्ला केला. सुरुवातीला त्यांनी चौकीत घुसण्याचा प्रयत्न केला. मात्र सुरक्षा दलांनी प्रतिकार केल्याने त्यांना यश आले नाही. त्यानंतर दहशतवाद्यांनी स्फोटकांनी भरलेले वाहन चौकीच्या बाहेरील भिंतीवर आदळवले. या भीषण स्फोटात चौकीचे मोठे नुकसान झाले आणि १२ जवानांसह १५ जणांचा मृत्यू झाला.

या हल्ल्याची जबाबदारी तहरीक-ए-तालिबान पाकिस्तान (TTP) या दहशतवादी संघटनेने स्वीकारली आहे. संघटनेने जारी केलेल्या पत्रकात या कारवाईत चार आत्मघाती हल्लेखोर सहभागी असल्याचा दावा करण्यात आला आहे. दरम्यान गेल्या काही महिन्यांत पाकिस्तानच्या उत्तर-पश्चिम भागात दहशतवादी कारवायांमध्ये लक्षणीय वाढ झाली आहे.

विशेषतः अफगाणिस्तान सीमेच्या जवळचा परिसर हा दहशतवाद्यांचा असलेला भाग मानला जातो. त्यामुळे या भागात सुरक्षा दलांवर वारंवार हल्ले होत असल्याचे दिसून येत आहे. या हल्ल्यामुळे पाकिस्तानातील सुरक्षेचा प्रश्न पुन्हा ऐरणीवर आला असून, सीमावर्ती भागातील दहशतवाद रोखण्याचे मोठे आव्हान पाकिस्तान सरकार आणि सुरक्षा यंत्रणांसमोर उभे राहिले आहे.