Imran Khan injured : पाकिस्तानचे माजी पंतप्रधान इम्रान खान यांच्या रॅलीत गोळीबार झाला. या गोळीबारात इम्रान खान जखमी झाले आहेत. त्यांच्या व्यतिरिक्त इतर चार जणही जखमी झाले आहेत. पोलिसांनी या प्रकरणात एका व्यक्तीला अटक केली आहे, असे वृत्त आहे. इम्रान खान यांना जखमी अवस्थेत नजीकच्या रुग्णालयात दाखल करण्यात आले आहे.

पाकिस्तानचे माजी पंतप्रधान इम्रान खान (Imran Khan) यांनी देशभरात आझादी मार्च काढला आहे. सध्याच्या सरकारविरोधात ते सातत्याने आवाज उठवत असून, रस्त्यावर उतरले आहेत. तोशखाना प्रकरणात इम्रान हे दोषी आढळले. त्यानंतर त्यांनी आझाद मार्चला सुरुवात केली. गुरुवारीही त्यांनी आझाद मार्च काढला होता. यावेळी गोळीबार झाला. त्यात इम्रान खान हे जखमी झाल्याची माहिती आहे. माजी राज्यपाल इमरान इस्मेल हे देखील या गोळीबारात जखमी झाले आहेत. (Breaking Marathi News)

रॅलीत झालेल्या गोळीबारात इम्रान खान यांच्या पायावर गोळी लागली आहे. तहरीक ए इन्साफचे अन्य नेतेही या गोळीबारात जखमी झाले आहेत. फवाद चौधरी यांच्या माहितीनुसार, इम्रान खान यांच्यावर एके ४७ रायफलीने गोळीबार केला आहे. त्यांच्या पायावर गोळी लागली असून, नजीकच्या रुग्णालयात त्यांना तात्काळ दाखल करण्यात आले आहे.